Ағаш қалдықтары демекші, жақында бір украиналық өнертапқыш ағаш жаңқасын жағу арқылы жеңіл автокөлік қозғалтқышын іске қосатын құрылғы ойлап тапқаны жөнінде бір қызықты ақпаратты естідік. Бір салғаннан елу шақырымды еңсеретін әлгі автокөлік иесіне таңдай қаққанымыз да рас. Сөйтсек, өнертапқыштар өзімізде де жетіп артылады екен.
Ағаш ұнтағын өндірістік көлемде өндіріп келе жатқан «Орман аймағы» ЖШС еліміздегі экологиялық таза отын өндіретін бірден-бір кәсіпорын. Мұндай алғашқы зауыт Петропавл қаласында іске қосылыпты. Ал Бурабай ауданындағы зауыт тек 2017 жылдың соңында ашылған. Аз уақытта кәсіпорын 500 тоннаға жететін ағаш жаңқасын өндіріп үлгеріпті. Зауыттың жылдық қуаты 3000 тонна отын өндіруге жетеді екен.
Компания басшысы Андрей Петроченконың сөзіне қарағанда, ағаш қалдықтарын отын ретінде пайдалану Еуропа елдерінде, АҚШ-та, Жапонияда, Ресейде кеңінен қолданылады. Дамыған елдерде ол өткен ғасыр-
дың орта шенінен бар екен.
– Ағаш жаңқасы – құнары жоғары отын. Оның пайдалы әсер коэффициенті 95 пайызға жетеді. Бұл ретте көмірдікі шамамен 50 пайыз болса, газ небәрі 30 пайызға пара-пар. Ол қымбат тұратын дизель отынының тоннасын немесе сұйытылған газды алмастыра алады, – деп атап өтті А.Петроченко.
Қазіргі таңда бір тонна биоотынның құны 35 мың теңгені құрайды. Компания басшысының айтуынша, ол әзірлеген отынға деген сұраныс күн сайын артып келеді. Экологиялық таза өнімнің еліміздің басқа аймақтарына ғана емес, сонымен бірге Қытай нарығына көптеп шығарылуы сөзімізге нақты дәлел болса керек. Оның үстіне баламалы отын өндіру жобасын жүзеге асыру құрылтайшының өз қаржысы есебінен жүргізілуде. Ол зауыт салып, жұмысын жүргізуге 120 миллион теңге жұмсапты.
Елбасының биылғы «Төртінші өнеркәсіптік революция жағдайындағы дамудың жаңа мүмкіндіктері» атты халыққа арнаған Жолдауында ХХІ ғасыр-
да әлемнің табиғи ресурстарға деген мұқтаждығы жалғасуда екендігі айтылған. Осы тұрғыдан алғанда «Орман аймағы» ЖШС сияқты кәсіпорындарға мемлекет тарапынан қолдау көрсетіліп, ғылыми институттармен тығыз байланыстар орнату – уақыт талабы. Мемлекет пен жекеменшік серіктестігін арттыру арқылы еліміз экономикасын айтарлықтай алға жылжытуға болатынын уақыттың өзі дәлелдеп отыр.
Асқар ТҰРАПБАЙҰЛЫ,
«Егемен Қазақстан»
Ақмола облысы
