Бүкіл әлем қарқынды дамытып жатқан технологиялық революциядан Қазақстан да тысқары тұра алмайды. Әлемге тән өзгеріс – қазақстандықтарға да тиесілі. Ақпараттық-коммуникациялық технологиялар саласындағы еңбек өнімділігін арттырып, қалыпты ырғақпен дамыта түсу үшін нақты шаралар бүгіннен бастап қолға алынуы тиіс.
Ұлттық өнерді дамыту жолында айырықша еңбек сіңіріп келе қос ұжымның да басшылары осы тұрғыда сөз алып, Мемлекет басшысының Жолдауында назар аударылып отырған барлық басымдықтардың маңызына тоқталды. Мемлекеттік «Салтанат» ән-би ансамблінің директоры Мақсат Закиров ортақ мақсат жолына жұмылдыратын биылғы Жолдаудың екі ұжымның да азаматтарына зор жауапкершілік жүктейтінін айтты. «Елбасының заманауи даму жолдарын ескере отырып, қазақ тілінің өркендеуіне, рухани жаңғыруға, халықтың денсаулығын нығайтуға баса назар аударғаны халқының бар қадір-қасиетін бойына жинаған ұлттық рухын көрсетті. Алдағыны болжап, ертеңгісін ойлайтын, қазақстандықтарды, бүкіл мемлекетті әлемдік өркениетке жетелейтін көреген басшы, саяси қайраткер, тарихи тұлға екенін тағы бір дәлелдеді», деді Мақсат Демешұлы.
Балет бишісі Денис Витченко болса, еліміз дамуының ендігі кезеңі үшін бұл Жолдаудың нақты іс-әрекеттерге орайластырылған біртұтас ұлт болу қадамымызды айқындай түсетін қуатқа ие құжат екенін жеткізді. Қазақстан дамуының барлық көкжиегін кеңейте түсетін бұл Жолдаумен әрбір адам мұқият танысып, өзінше зерделеуі тиіс. Ол өз әріптестерін Елбасы белгілеп берген негізгі он міндеттің орындалуына атсалысып, оған толық қолдау білдіруге шақырды.
Айгүл АХАНБАЙҚЫЗЫ,
«Егемен Қазақстан»
АЛМАТЫ
