Президент • 09 Ақпан, 2018

Елбасы медициналық мекемелерді ақпараттық жүйемен қамту керектігін айтты

297 рет
көрсетілді
2 мин
оқу үшін

Үкіметтің кеңейтілген отырысында Президент Нұрсұлтан Назарбаев медициналық мекемелерді ақпараттық жүйелермен, сондай-ақ компьютермен қамтамасыз ету мәселесін көтерді. Бұның барлығы бірыңғай денсаулықтың электронды төлқұжаты сияқты қызметтерді іске қосуға кедергі болып, қағазбастылықты көбейтіп отыр, деп хабарлайды ҚазАқпарат.

Елбасы медициналық мекемелерді ақпараттық жүйемен қамту керектігін айтты

«Медициналық мекемелерде ақпараттық жүйелерді енгізудің ең төмен көрсеткіші - 21 процент Шығыс Қазақстанда тіркелген. Даниал (облыс әкімі - авт.), тұр, тез тұр дедім. Ақтөбеде облысында - 37 процент, Астанада 31 процент екен. Бәрің тұрыңдар!», - деді Н.Назарбаев. Осыдан кейін әкімдер кезек-кезек есеп берді. Шығыс Қазақстан облысының әкімі Даниал Ахметовтің айтуынша, аймақта медициналық мекемелерді компьютерлер және басқа техникамен қамтамасыз етуге 1 млрд теңге бөлінген болатын.

«Алайда барлық техниканы қаржы министрлігінің сатып алулар комитеті сатып алады», - деді Д. Ахметов. Дегенмен, ҚР Қаржы министрі Бақыт Сұлтанов оның сөзін жоққа шығарды. «Нұрсұлтан Әбішұлы, біз тек сатып алулар алаңын ғана ұсынамыз. Комиссиялардың барлығы өңірде отырады. Бәрін солар шешеді. Ондайда бізге сілтей салады. Ол дұрыс емес», - деп атап көрсетті Б.Сұлтанов. Ал Ақтөбе облысының әкімі Бердібек Сапарбаев компьютерді сатып алуға ақшаны толығымен бөлгенін жеткізді.

Астана әкімі Әсет Исекешев те алдағы уақытта өзіне жүктелген міндеттерді орындауға уәде етті. «Бұл - халықтың денсаулығы. Ұсақ-түйек нәрсе емес. Министрлік барлық жұмысты үйлестіруі тиіс. Әкімдер жүктелген тапсырманы орындауы қажет. Істей алмасаңдар, айтыңдар! Жұмысты атқаруға не кедергі? Бұл - аса өзекті мәселе, оны тездетіп шешу керек», - деп атап көрсетті Н.Назарбаев. Бұдан бөлек, Мемелекет басшысы Солтүстік Қазақстан, Қостанай мен Ақмола облыстарының әкімдерін тұрғызып, бір сілкілеп алды. Себебі аталған аймақтарда медициналық мекемелерді интернетпен қамту көрсеткіші төмен болып тұр. ҚР Денсаулық министрі Елжан Біртановтың айтуынша, ағымдағы жылы маусым айынан бастап денсаулықтың электронды төлқұжаты пилоттық режімде енгізіледі.

«Егер жылдың аяғына дейін барлық аймақтар ақпараттық жүйелерін ретке келтірсе, келесі жылдан бастап денсаулық саласының басым бөлігі электронды режімде жұмыс істейтін болады», - дейді Е.Біртанов.