Аталған спорттық шара Оңтүстік Кореяда алауы жағылған Ақ Олимпиадаға арналды. Еске салсақ, Пхенчхандағы ойындарға Қарағанды облысынан үш спортшы қатысады. Олар коньки киген жүйріктер Екатерина Айдова, Станислав Палкин және Артём Крикунов.
Спартакиаданың ашылу салтанатында мұз үстінде жүзге жуық адам қатысқан флешмоб көрерменді тәнті етті. Шараға қатысушылар осындай қойылыммен қысқы Олимпия ойындарында ел намысын қорғайтын жерлестеріне қолдау білдіріп, жігер береміз дегенді айтты.
Арқадағы ақ спартакиада додасына қысқы спорт түрлері бойынша 600-ден астам адам қатысуда. Айта кету керек, бұлардың бәрі де кәсіпқой спортшылар емес. Жарыстар спорттың төрт түрі бойынша өтеді: қысқы Президенттік көпсайыс, шаңғымен жүгіру, допты хоккей және конькимен жүгіру. Қысқы спартакиада қорытындысында үздік спорттық қала мен ауыл анықталады.
Қайрат ӘБІЛДА,
«Егемен Қазақстан»
ҚАРАҒАНДЫ
