Қазақстан • 20 Ақпан, 2018

Алматыда сапасыз өнімдер азаймай тұр

280 рет
көрсетілді
5 мин
оқу үшін

Өткен жылдың қорытындысына сәйкес, бір ғана Алматы қаласында Қоғамдық денсаулық сақтау басқармасы сараптама негізінде сатып алған тауарлардың 10,1 пайызы қолданыстағы заңнама талаптарына сәйкес еместігін анықтаған. Оның ішінде тамақ өнімдерінің үлесі 10,4% болса, балаларға арналған тауарлар 20,0%, ойыншықтар 21%, жеңіл өнеркәсіп өнімдері 40 пайызды құраған. 

Алматыда сапасыз өнімдер азаймай тұр

Отандық нарықты сырттан әкелінген сапасыз тауарлардан қорғау мақсатында 63 субъек­тіге қатысты әкімшілік іс қозғалып, 7 млн 265 теңге көлемінде айыппұл салынса, 19 субъек­тінің қызметі тоқтатылып, барлығы 6 705 013 теңге тұратын 4423,11 кило жарамсыз өнім қол­даныстан шығарылды.

Алматы қаласы Қоғамдық денсаулық сақтау басқармасының мамандары сапасыз азық-түлік, балалар ассортименті және басқа да халық тұт­ынатын тауарларды анықтау негізінде жүр­гізілген жұмыс легі туралы мәлімдеді. Олар­дың айтуынша, 2017 жылы жоспарлы түрде 19 түрлі тамақ өнімдері сатып алынған. Нәти­жесінде 2613 өнімнің 264-і санитарлық-эпидемиологиялық сараптама қорытындысына сәйкес нормативтік техникалық құжаттама талаптарына сай келмеген. Оның 12,9 пайызы отандық өндіріске тиесілі болса, 5,7 пайызы – ЕАЭО елдерінен әкелінген өнімдер.

«Қала базарлары мен дүкендерде сапасыз өнімнің айналымын анықтау және бұлтартпау бойынша жұмыстар тұрақты негізде жүргізіліп келеді. Ай сайын халыққа ұсынылатын өнімге бақы­лау сатып алулары жүзеге асырылып, ішкі эко­номикалық қызметтің қатысушыларына қатыс­ты камералық бақылау, оған қоса тамақ өне­ркәсіптеріне жоспарлы түрде тексе­ріс ұйым­­дас­тырып отырамыз. 2017 жылы бар­лығы 5 млн теңге көлемінде сатып алу­лар жа­салды. Заң бұзушылықтардың үлкен бөлі­гі таңба­лау­дың сәйкес келмеуінен және қауіп­­сіз­­діктің мик­ро­биол­огиялық көрсет­кіш­теріне байланыс­ты анық­талды. Тамақ өнімі­нің түрлері бо­йын­ш­а ең көп сәйкес емес көр­сет­кіштер: ет өнім­дерін­де – 29,7, аспаздық өнім­дерде – 29,2, балық өнім­дерінде – 28,4, құс өнім­дерінде – 23,0, биоло­гия­лық белсенді қоспа­лар – 15,7, көк­өністер мен же­містер – 13,9, кондитерлік өнім­дер – 13,0. Жет­піс екі өн­ді­ру­шіден сатып алын­ған сүт пен сүт өнім­дері­нің 211 түрлі сына­ма­сы­ның 8-і талапқа сәй­­кес емес. Балалар мен жас­өс­­пі­рімдерге ар­н­ал­­ған өнім­дерді бақылау да әр­­дайым басты назар­да. Тексеру мақсатында ба­ла­­ларға арналған өнімнің 165 үлгісі сатып алын­­са, оның ішінде 81-і ойыншық үлгілері. Өкі­ні­ш­­ке қарай, тексеру қорытындысында 33 сы­на­­ма тех­н­икалық регламент талаптарына сәй­кес кел­­меді», дейді қалалық Қоғамдық денсау­лық сақтау бас­қар­масының басшысы Айзат Мол­дағасимова.

Аталған мекеменің бастамасымен халықты сапасыз өнімнен сақтандыру бойынша бірқатар жобалар іске асып, кейбір өнімдердің зиянды тұстары әшкереленген. Бұл тұрғыда қала базарларында самсап тұрған бір ғана терезе жуатын сұйықтықтарды атауға болады. Сараптама нәтижесінде оның құрамында метанол мөлшері шама­дан тыс екені анықталған. Нақтырақ айтсақ, Алматы қаласы бас мемлекеттік сани­тар­­лық дәрігерінің қаулысымен Литваның «MANNOL», Ресейдің «АвтоЛюкс» және отан­дық өндірушілердің «Омывайка» атты терезе жуа­тын сұйықтықтарын қолдануға және сатуға тыйым салынған. Мамандардың айтуынша, қазіргі уақытта сәйкессіздік себептерін анық­тау және кінәлі тұлғаларды жауапқа тарту үшін тексеру жұмыстары жүргізілуде. Айта бер­сек, бұдан өзге де нан, сүт өнімдері, суши, пиц­ца, хот-дог, кәуап, донер, қоғамдық тамақтан­ды­ру кәсіп­орын­дарының бірінші және екінші тағам­­дарына қа­тысты тұрғындардан шағым көп түскен.

– Сапасыз тамақ өнімдерін дайындайтын және сататын кәсіпорындарға қатысты бірқатар шағым түсіп, тексеріс жүргізілді. Осының  нәтижесінде анық­талған заң бұзушылықтар бойынша әкім­шілік шаралар қолданылды. «Виктория», «Магнум», «Достық», «Түрген», «Севилия», «Афон-про» дүкендері мен тамақ сау­да орын­дары­­на, «Жадыра-жайна», «Жайсаң», «Таг­лаура», «Ата донер», «Тандор», «Ифтар», фаст фуд «Дональдс», «Рома кафе», «Эдем», «На даче», «Тастемир», «Меззалуна» қоғамдық та­мақ­тану кәсіпорындарына айыппұл салынып, тиіс­ті шара қолданылды. Қазіргі уақытта қала тұты­ну­шыларына санитарлық ақпараттандыру жұ­мыс­тарын жүргізу маңызды мәселе болып отыр. Өнімнің қауіпсіздік мониторингі, жасанды тауарлар мен ГМА-ны анықтау бойынша ақпа­раттар бұқаралық ақпарат құралдарында жария­ланып, халықаралық ғылыми-тәжірибелік кон­фе­рен­цияларда осы сұрақтар көтерілуде, – дейді Айзат Молдағасимова.

Мамандар кейбір кәсіпорындар тексеріс кезінде уақытша өз қызметтерін тоқтатып, тексеруге кедергі жасайтынын айтады. Жуырда Үкімет басшысы Бақытжан Сағынтаев министрлерге ішкі нарықты қауіпті азық-түліктен қорғау үшін қатаң шара қолдануды тапсырған еді. Ол адам денсаулығына аса зиян деп, сауда сөре­лерінен алынған тағамдардың қайда кетіп жат­қанын ешкім білмейтінін, тіпті құрамында хими­каты көп ондай өнімдер қайта саудаға түсуі ықтимал екенін, сондықтан дүкендерді жіті тексеру керек дегенді қадап айтқан болатын. Сапалы өнім – қоғам денсаулығының кепілі. Сондықтан бұл мәселені бақылауда барынша мұқият болған жөн.

Арман ОКТЯБРЬ,
«Егемен Қазақстан»

АЛМАТЫ

Соңғы жаңалықтар