Партияның өңірлік бөлімдері арасында Астана қалалық филиалының алар орны ерекше. Өйткені Астана – еліміздің бас қаласы ғана емес, халықаралық мәселелер талқыланатын алаң және Қазақстанның мәдени, ғылыми, инновациялық орталығы. Одан бөлек, елордамыз бүгінде жедел әрі қарқынды өсіп келе жатқан еліміздегі ірі мегаполистердің бірі.
Кездесу барысында Мәулен Әшімбаев Елбасы, партия Төрағасы Нұрсұлтан Назарбаевтың «Нұр Отанның» қызметін жаңғырту жөніндегі тапсырмалары мен алға қойған міндеттеріне ерекше назар аударды.
Партия Төрағасының бірінші орынбасары одан әрі Елбасы тапсырмаларын сапалы әрі уақтылы орындау үшін нұротандықтарға білек сыбанып жұмыс істеу керектігін айтты. Ол үшін ең алдымен партия қызметін бюрократиялық жүйеден арылтып, жаңа жұмыс тәсілін түзу қажет. «Нұр Отан» өз жұмысын
заманауи, ашық әрі креативті саяси бірлестік ретінде жүргізуі тиіс. Партия ұйымдастырған барлық іс-шара жүйелі, тиімді және қоғам үшін пайдалы болуы керек. Жаңа жұмыс тәсілі мен үлгісі, цифрлы технологияны енгізу, жастарға, мүмкіндігі шектеулі жандарға, ардагерлерге және зейнеткерлерге қолдау көрсету – партия қызметінің бір бөлігі ғана. Сонымен бірге партия жұмысының пайдасын шағын және орта бизнес өкілдері мен инновация саласында еңбек етіп жүрген жандар да сезінуі тиіс.
– «Нұр Отан» партиясына еліміздегі саяси, экономикалық және рухани жаңғыру жұмыстарына жүйелі түрде қатысатын стратегиялық күш болып қалыптасу міндеті жүктеліп отыр. Бұл – өте ауқымды әрі жауапты миссия. Сондықтан партияны Елбасының ұйымдық, саяси, идеологиялық және креативті орталығына айналдыру мақсатында барша нұротандықтар күш біріктіріп жұмыс істеуі керек, – деді Мәулен Әшімбаев.
Сонымен қатар «Нұр Отан» партиясы Төрағасының бірінші орынбасары астаналық әріптестерінің назарын бас қаладағы қоғамдық-саяси жағдайды үнемі бақылауда ұстап, халықты алаңдатқан мәселеге қатысты жедел әрекет ету керектігіне аударды. Сондай-ақ сайлауалды бағдарламаны жүзеге асыру әрдайым партия жұмысының басым бағыты болып қала беретініне де тоқталды.
– Біздің басты міндетіміз – елдің мүддесіне жұмыс істейтін ХХІ ғасырдың заманауи, тиімді, инновациялы, жоғары технологиялы партиясын құру. Сондықтан нақты жұмыстарға басымдық беруіміз керек, – деді М.Әшімбаев.
Жиын барысында қала басшысы, партияның Астана қалалық филиалының төрағасы Әсет Исекешев партия қызметін жаңғырту бастамасына қолдау білдірді. Сондай-ақ ол қалалық филиал жұмысын «қайта жүктеу» бағытындағы жоспарларымен бөлісті.
* *
Сондай-ақ кеше Елбасы, «Нұр Отан» партиясының Төрағасы Нұрсұлтан Назарбаевтың шешімімен Тамара Дүйсенованың партия хатшысы қызметіне тағайындалғаны мәлім болды.
Орталық аппарат ұжымына жаңа хатшыны таныстырған «Нұр Отан» партиясы Төрағасының бірінші орынбасары Мәулен Әшімбаев Тамара Дүйсенованың мемлекеттік қызметте және басшылық лауазымда тәжірибесі мол екенін ерекше атап өтті. Сондай-ақ ол Елбасының партия қызметін жаңғырту жөніндегі тапсырмасын жүзеге асыруға жаңа хатшының үлкен үлес қосатынына сенім білдірді.
– Сіздің әлеуметтік саладағы бай тәжірибеңіз партия жұмысына игі әсерін тигізеді деп есептеймін. Себебі әлеуметтік мәселелерді шешу «Нұр Отан» партиясының басым бағыттарының бірі болып саналады. Сіздің партия қатарына келуіңізбен осы бағыттағы жұмысымызды одан әрі күшейтеміз деп сенемін, – деді Мәулен Әшімбаев.
Жолдыбай БАЗАР,
«Егемен Қазақстан»
