Кеше Бас Прокурордың төрағалық етуімен Заңдылықты, құқықтық тәртіп пен қылмысқа қарсы күресті қамтамасыз ету жөніндегі үйлестіру кеңесінің отырысы өтті. Онда жеке кәсіпкерлік субъектілерінің құқықтарын қорғау саласындағы заңдылықтың жай-күйі және олардың қызметіне заңсыз араласу фактілерінің жолын кесу бойынша мемлекеттік органдар қабылдаған шаралар туралы мәселе қаралды.
Жеке кәсіпкерлікті қолдау және бизнесті дамытуға қолайлы жағдай жасау – мемлекеттік саясаттың стратегиялық міндеттерінің бірі. Алайда, бизнеске әкімшілік қысым жасау әлі күнге дейін орын алуда. Прокурорлық тексерулердің қорытындылары мемлекеттік органдардың кәсіпкерлер құқықтарын бұзылуының көптеген фактілерін анықтады. 2010 жылдың басынан 6 995 заң бұзушылық анықталып, 4 844 кәсіпкердің конституциялық құқықтары қорғалды. 1 128 лауазымды тұлға түрлі жауапкершілікке тартылды.
Үйлестіру кеңесі қалыптасқан жағдайды ескере отырып, барлық мемлекеттік органдарға бизнес ісіне араласу фактілерін түбірімен жою үшін жан-жақты шаралар қабылдау және тексерулерге ведомстволық бақылауды күшейту туралы ұсыныс жасады. Осы мақсатта тексерулерді жүйелендіруге және бизнес жүргізудің заңды жолдарын ынталандыруға бағытталған тәуекелді бағалау жүйесінің критерийлеріне сәйкес тексерулерді міндетті түрде жоспарлау қажеттігі атап өтілді. Сондай-ақ Үйлестіру кеңесі келешекте әкімдердің рейтинг көрсеткіштеріне қоса отырып, өңірлер бөлігінде бизнес жүргізу шарттарын бағалаудың бірыңғай жүйесін әзірлеуді ұсынды. Тексеру жүргізу тәртібін бұзғаны үшін лауазымды тұлғалардың жауапкершілігін арттыруды көздейтін заңнамаға өзгерістер мен толықтырулар енгізуге бастама жасау ұсынылды, деп хабарлады Бас прокуратураның баспасөз қызметі.
