«Ақтау теңіз порты» АЭА АҚ Басқарма төрағасы Бауыржан Қайратовтың баяндауынша, «Ақтау теңіз порты» АЭА 2002 жылы экспортқа бағытталған жоғары технологиялық өндіріске инвестиция тарту мақсатында құрылған болатын. Мұнда 27 қатысушы тіркелген. Италия, Түркия, Германия, Қытай, Англия, Әзербайжан инвесторлары қызмет етеді. Қазірдің өзінде 18 инвестициялық жобалар жүзеге асырылып, 1300 жұмыс орны ашылды. 260,4 миллиард теңгенің өнімі өндіріліп, бюджетке 23,6 млрд. теңге түсім түсті.
Маңғыстау облысының әкімі Ералы Тоғжанов «Ақтау теңіз порты» аумағында жүзеге асырылатын жобалар ерекше бақылауда екенін атап өтті.
Премьер-Министрдің бірінші орынбасары Асқар Мамин АЭА қатысушы кәсіпорындар өздерінің өнімдерін ішкі және сыртқы нарықтарға шығаруға бәсекелестікке сай болуы керектігін айтты. АЭА шетел инвестициясын тартуды белсенді жүргізу қажет екендігіне, бұл мәселе Үкіметтің ерекше бақылауында тұрғандығы туралы ерекше атап өтті.
Каспий өңіріндегі 2018-2020 жылдарға арналған логистикалық инфрақұрылымды дамыту жоспары туралы «ҚТЖ» ҰК» АҚ вице-президенті Санжар Елубаев баяндады.
Оның айтуынша, 2017 жылы Қазақстанның Каспий мультимодальдық тізбегі 5,5 миллион тонна жүк өңдеді. Оның ішінде құрғақ және паромдық жүктер жалпы жүктердің 80% дейін жеткізілді. Бұл көрсеткіш 2016 жылы 60% болатын.
2018 жылы Қазақстан порттары арқылы өткізу жоспары он миллион тоннадан астам болса, ондағы құрғақ және паромдық жүктер көлемі 80% сақталады. Бұл межені 2020 жылдары 16,7 миллион тоннаға жеткізу жоспарда бар. 2018 жылы 35 мың ЖФЭ контейнер тасымалдау жоспарланса, 2020 жылдары оны 300 мың ЖФЭ-ға жеткізу көзделіп отыр.
2017 жылы Құрық порты арқылы 1,5 миллион тонна түрлі жүктер өткізілді. Биылғы жылы оны 4,5 миллион тоннаға жеткізу жоспарланып отыр.
Премьер-Министрдің бірінші орынбасары Каспий бойындағы логистикалық инфрақұрылым нысандары Транскаспий көлік дәлізін дамытудағы негізгі тізбек екендігіне мән берді. Сондай-ақ, А.Мамин Маңғыстау облысына жұмыс сапары барысында Құрық портының қызметімен, шекаралық және кеден аймағы инфрақұрылымымен, әлеуметтік нысандармен, сонымен қатар Кавказ өңірі, Ресей, Түркияға автокөліктерді өткізу үдерісімен танысты. Ағымдағы жылы 20 мың техниканы паром арқылы өткізу жоспарланып отыр. Бұл өткен жылдың сәйкес мерзімімен салыстырғанда екі есеге жоғары көрсеткіш.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы
