«Жолаушылар тасымалы» АҚ жылжымалы құрамды жаңарту бағдарламасын іске асыруды жалғастыруда. Жолаушылар вагон паркі 12 купелік вагондармен толықтырылды, оның ішінде 2 вагон штабтық – олар мүмкіншілігі шектеулі жандар мен оларды алып жүрушілерге арналған.
Жаңа вагондар сапардың жайлылығын қамтамасыз етеді. Темір жол көлігі қауіпсіздік және сапа жағынан барлық халықаралық стандарттарға сай. Жылжымалы құрамды өндіру кезінде заманауи, экологиялық таза және жануы қиын материалдар пайдаланылған.
Ұлттық тасымалдаушы мүмкіндігі шектеулі жандарға жайлы жағдай жасауға көңіл бөлуде. Осыған орай, компания мүгедектер мен оларды алып жүрушілерге арналған 2 штабтық купе вагондарына тапсырыс берді. Олар арбада отырған мүгедекті пойызға отырғызып, түсіретін автоматты көтергіш құралдармен қамтамасыз етілген. Сонымен қатар, вагонның тамбуры, дәлізі, купесі және санитарлық торабы кеңейтіліп, мүмкіндігі шектеулі жанның өздігімен қозғалуына кедергі жасамайды.
Құрамдар экологиялық таза дәретханалармен, аудио және бейнетасымалдау жүйелерімен, желдеткіштермен, жылу және өрт сөндіру дабылдатқыштарымен қамтамасыздандырылған. Вагондарда қысқатолқынды пеш, тоңазытқыш, сонымен қатар ақпараттық табло, әр купеде теледидар орнатылған. Купелік вагон 40 орынға, купелік штабтық – 34 орынға есептелген.
«Жолаушылар тасымалы» АҚ 2012 жылы 180 заманауи вагонды сатып алуды жоспарлап отыр, бұл өз кезегінде халықтың темір жол көлігімен жолаушылар тасымалына деген сұранысын қанағаттандырады.
«Егемен-ақпарат».