Тәуелсіздіктің 20 жылдығы қарсаңында көптеген жаңа кәсіпорындар мен әлеуметтік-мәдени нысандар пайдалануға беріліп, өңірдің экономикалық әлеуетін арттыра түсуде. Жақында Ақтөбе қаласында тағы бір тың жоба жүзеге асырылып, пороллон және қайталама пороллон бұйымдарын шығаратын зауыт іске қосылды. Бұл кәсіпорын ел Тәуелсіздігінің 20 жылдығына орай облыстың үдемелі индустриялық-инновациялық даму бағдарламасы аясында пайдалануға берілді. Жобаны «Южпромснаб» ЖШС жүзеге асырды. Серіктестік директоры Светлана Зоткинаның мәлімдеуінше, бұл зауыт Батыс Қазақстандағы теңдесі жоқ бірегей кәсіпорын. Жобаны жүзеге асыруға серіктестік өзінің 82,4 млн. теңге қаржысын салыпты. Жобалық қуаты жылына 10 мың тонна өнім өндіруге мүмкіндік беретін зауытта жаңадан 10 жұмыс орны ашылды. Зауыттың қондырғылары да, шикізаты да Ресейдікі. Мұнда жұмыс істейтін маман жұмысшылар Ресейдің Ижевск қаласында тәжірибеден өткен. Кәсіпорын өзін үш жылда ақтайды деп күтілуде. Зауытта шығарылатын жұмсақ пенополиуретан жиһаз, автомобиль және әуе көліктерінің орындықтары өндірісіне таптырмайтын материал, сондай-ақ, оны жұмсақ ойыншықтар мен спорттық төсеніштер жасауға пайдалануға да болады. Зауыттың тұсаукесерінде сөз алған Ақтөбе қаласының әкімі Нұрмұхамбет Әбдібеков бұл жобаны шағын және орта кәсіпкерлікті дамытудың тамаша үлгісі ретінде бағалады. Шаһар басшысы жыл аяғына дейін осындай 20 нысан пайдалануға берілетінін, 800-ден астам жұмыс орындары ашылатынын жеткізді. Зауыттың бас технологы Александр Буданов өндіріс үдерісімен таныстырып, алғашқы өнімді шығарып, ұсынды. Бұған дейін пороллонды Ресейден алып келген ақтөбелік жиһаз құрастырушылар енді бұл өнімді алыстан арбаламай, өзімізден ала алатын болды. Шағын болса да өнімдеріне сұраныс жоғары кәсіпорынның толық қуатында жұмыс істеп кететініне сенім мол.
Сатыбалды СӘУІРБАЙ.
Ақтөбе облысы.
