Кеше Парламент Сенатының кезекті отырысы болып, онда палата бюросы ұсынған күн тәртібі қаралмас бұрын ұйымдық мәселелер қаралды. Оны Сенат Төрағасының орынбасары Александр Судьин ашып, жүргізіп отырды. Ол алғашқы сөзді отырысқа қатысып отырған Президент Әкімшілігінің Басшысы Аслан Мусинге берді.
Аслан Есболайұлы өзінің Сенатқа Президент Нұрсұлтан Назарбаевтың тапсырмасымен келгенін айтты. Қазақстан Республикасы Конституциясының 50-бабы 2-тармағына сәйкес, мерзімдері аяқталған Сенат депутаттарының орнына Президент Жарлығымен басқа депутаттар тағайындалды. Соның ішінде Мұхтар Алтынбаев, Берік Имашев, Қайрат Мәми және Бауыржан Мұхамеджанов қайтадан, ал Икрам Адырбеков, Ерлан Нығматулин және Людмила Полторабатько жаңадан тағайындалды, деді. Сондай-ақ Аслан Мусин өкілетті мерзімдері аяқталған Нұрлығайым Жолдасбаева, Мұхамбет Көпей және Қуаныш Сұлтановқа мемлекеттік қызметтегі ұзақ жылғы жемісті еңбектері үшін Елбасының атынан алғыс айтатынын жеткізді. Одан әрі Президент Әкімшілігінің Басшысы Парламент және оның депутаттарының мәртебесі туралы Конституциялық заңның 9-бабына сәйкес Елбасы Н.Назарбаев Сенат Төрағасы қызметіне Қайрат Мәмидің кандидатурасын ұсынатынын жариялап, депутаттардың қолдауларын өтінді.
Сенаторлар, регламентке сәйкес, алдымен санақ комиссиясын сайлап, одан соң ұсынылған кандидатураны дауыс беру бюллетеніне енгізіп, жасырын дауыс беру тәртібімен сайлау өткізді. Сайлаудан кейін сөз алған санақ комиссиясының төрағасы Болат Жылқышиев Қайрат Мәмидің бірауыздан сайланғанын жариялады. Төрағалық орындыққа отырған соң Қ.Мәми өзіне сенім көрсеткен Елбасыға және қолдау білдірген әріптестеріне алғысын айтып, алдағы уақытта да абырой биігінен көрінуге жұмыс істейтінін жеткізді. Ал өкілеттік мерзімдері аяқталған М.Көпей, Қ.Сұлтанов және Н.Жолдасбаева алдымен үлкен сенім көрсетіп, өздерін сенаторлыққа тағайындаған Елбасына, сосын бірлесе жұмыс істеген әріптестеріне, аппарат қызметкерлеріне ризашылықтарын білдіріп, сенаторлармен қоштасты.
Сенат Төрағасы Қ.Мәми өкілеттігі аяқталған М.Көпейдің орнына Сенат Төрағасының орынбасарлығына Қайрат Ищановтың кандидатурасын ұсынды. Регламентке сәйкес, ашық дауыс беру тәртібімен сайланатын орынбасарлық қызметке Қ.Ищанов бірауыздан сайланды.
Осыдан кейін депутаттар күн тәртібіндегі мәселелерді қарауға кірісті. Алдымен Мәжіліс мақұлдаған Қазақстан мен Беларусь Үкіметтері арасындағы азаматтық қорғаныс, төтенше жағдайлардың алдын алу және оларды жою саласындағы ынтымақтастық туралы келісімді ратификациялау туралы заң жобасы қаралды. Бұл туралы Төтенше жағдайлар министрі В.Божко және сенатор Ғ.Қасымов баяндады. Заң бірауыздан қабылданды. Келесі мәселе Мәжіліс мақұлдаған мәдени құндылықтарды заңсыз әкелуге, әкетуге және оларға меншік құқығын беруге тыйым салу мен олардың алдын алуға бағытталған шаралар туралы конвенцияны ратификациялау туралы заңның жобасы жөнінде болды. Бұл мәселе бойынша негізгі баяндаманы жасаған Мәдениет министрі М. Құл-Мұхаммедке де, қосымша баяндама жасаған сенатор Ж.Ерғалиевке де ешқандай сұрақ болмай, заң бірауыздан қабылданды.
Үшінші және төртінші мәселелер Кеден одағына қатысты шарт пен келісімді ратификациялау туралы заң жобаларына арналды. Алғашқысы Кеден одағына мүше мемлекеттердің кеден заңнамасын бұзғаны үшін қылмыстық және әкімшілік жауапкершілікке тарту ерекшеліктері туралы шартты, екіншісі осы істер бойынша құқықтық көмек және өзара іс-қимыл туралы келісімді ратификациялауды қарастырады. Негізгі баяндаманы жасаған Қаржы министрі Б.Жәмішевке бірқатар сұрақтар болғанымен, заң бірауыздан қабылданды.
Одан кейінгі мәселе екі оқылымнан өтіп, бірқатар өзгерістерімен Мәжіліске қайтарылған «Неке (ерлі-зайыптылық) және отбасы туралы» Кодекс жобасына арналды. Мәжілістің уақытша болмауы кезінде оның функциясын Сенат атқаруына байланысты ұсынылған Кодекс өзгерістерімен толық қабылданды. Кейбір заңнамалық актілерге мемлекеттік әлеуметтік тапсырыс мәселелері бойынша өзгерістер мен толықтырулар енгізу туралы заң жобасы мен «Нотариат туралы» заң жобасы да Мәжіліске қайтарылған болатын. Енді олар да ұсынылған өзгерістерімен толықтай қабылданды.
Отырыс соңынан депутаттардың орталық органдарға жолдайтын сауалдары жарияланды.
Жақсыбай САМРАТ.
