2018 жылғы 26 ақпан күні Алматы облысы Жамбыл ауданының әкімінен Жамбыл ауданындағы Ұзынағаш, Ынтымақ және Қайназар ауылдарындағы төтенше жағдайлардың салдарын жоюға қосымша күштерді тарту үшін Ұлттық ұланның 28237 әскери бөлімінің мекенжайына өтініш хат келіп түскен болатын. Соның негізінде әскери бөлім командирінің шешімімен 26-28 ақпан аралығында 130-дан аса ұландық құтқарушылар мен 10-нан аса арнайы техникалар апат орын алған аудандарда таңнан кешке дейінгі мерзімде құтқару жұмыстарын жүргізді, деп хабарлайды Ұлттық ұланның 28237 әскери бөлімі.
Ұлттық ұланның құтқарушы бөліністері жеке құрамының күштерімен жүргізілген жұмыстар нәтижесінде Ұзынағаш, Қайназар және Ынтымақ ауылдарына техникалармен 400 тонна құм әкелініп 6000-нан аса қап құммен толтырылды. 14 көшенің бойында орналасқан тұрғын үйлердің аулалары жиналып қалған сулар мен лайлардан тазартылып, үйлердің іштеріне су өтпес үшін құм толтырылған қаптармен толық бөгеттелді. Су басып қалған 8 үйдің тұрғындары қауіпсіз жерге шығарылды. Су бағытын арналарға бұру мақсатында арнайы техникалармен 300 метрден аса жыралар жасалды. Жеке құрамның күштерімен 4000 метрден аса тұрғын үйлердің аулалары мен көшелері жалпы көлемі 16 тонна лайлардан тазартылды. Соның нәтижесінде жалпы 80-ге жуық тұрғын үйдің су басу қаупі сейілді.
2018 жылғы 28 ақпан күні су алған өңірдің ахуалымен және жасалып жатқан жұмыстардың нәтижесімен танысу үшін Алматы облысының әкімі Амандық Баталов арнайы келіп, Ұзынағаш пен Қайназар ауылдарын аралады. Өз кезегінде Ұлттық ұлан жауынгерлерінің жүргізіп жатқан жұмыстарына үлкен баға беріп әскери бөлім командиріне алғысын жеткізді.
