Мемлекеттілік мерекесі бізге той тойлау үшін емес, ой ойлау үшін керек.
Елбасымыз осылай деді. Тәуелсіздіктің жиырма жылдығын зердеге салу, оның тарих үшін қып-қысқа, бірақ біздің елдігіміз үшін байтақ шежіресінен тағылым алу бәрінен де маңызды екенін айтты.
Бұл кезеңде Қазақстан ғасырларға теңесетін ғажайып жолды жүріп өтті. Бұл жолда бәрі де болды: бұрыннан қалыптасқан шаруашылық байланыстары үзіліп, шығарған өнімдерін өткізе алмай дағдарған кәсіпорындар, алты айлап айлық, жылдап зейнетақы ала алмай, егемендіктің елең-алаңындағы еңсені езер қиындықтардан қажыған жұрт, кеңбалақ күйде жүрген қазақтың базар психологиясына бой үйрете алмай асып-сасуы, ала қапшық арқалап, отбасын асыраған әйелдер, жекешелендіру жанталасы, нарық жағдайында өмір сүруге бейімделудің бастапқы қадамдары, экономикалық реформалардың алғашқы нәтижелерін беруі, әлеуметтік саланың еңсе тіктеуі, халықтың көңіл-күйінің қалпына түсуі, елдің ертеңіне сенімнің орнығуы, инвестициялардың келе бастауы, жасампаздық жұмыстың жолға қойылуы, елдің әл-ауқатының артуы, Астананың салынуы, қалада да, далада да құрылыстың қарқын алуы, өз өндірісіміздің өркендеуі, мемлекетіміздің Батысқа да, Шығысқа да бірдей танылып, бірдей құрметтелуі, бүкіл түркі әлемінен, бүкіл мұсылман жұртынан, бүкіл ТМД кеңістігінен тұңғыш рет Еуропа төріне көтеріліп, төбебилік жасау, Астана Саммитін өткізу, Ислам Ынтымақтастығы Ұйымына төрағалық ету...
Иә, тарих сағатының тілі сырт ете қалғандай қысқа кезеңде Қазақстан осындай жасампаздық жолдан өтті. Біздің бұл ұлы жолдағы көшімізді бүгінде дүйім дүние танитын, мойындайтын, құрметтейтін Президентіміз Нұрсұлтан Назарбаев біліктілікпен, байыптылықпен бастай білді. Елім деген Ерге кәміл сенген, кәміл сенген соң екі тізгін, бір шылбырды қолына берік берген Ел де тарих сынына лайықты шыдап шықты. Елдігін, кеңдігін, далалық даналығын танытты.
Міне, той табалдырығына да тақап қалдық. Енді жиырма күннен кейін мемлекетіміздің мерейлі мерекесін атап өтеміз. Осыған орай елде ЖҰЛДЫЗДЫ ЖИЫРМА КҮН жарияланып отыр.
Оларға:
«Менің Қазақстаным» (26 қараша),
«Атамекен» (27 қараша),
«Ата Заң» (28 қараша),
«Бейбітшілік белдеуі» (29 қараша),
«Келісім» (30 қараша),
«Азаматтық қоғам» (1 желтоқсан),
«Дәстүр» (2 желтоқсан),
«Болашақ» (3 желтоқсан),
«Сергектік» (4 желтоқсан),
«Ғылым» (5 желтоқсан),
«Мәдениет» (6 желтоқсан),
«Алтын теңге» (7 желтоқсан),
«Шаңырақ» (8 желтоқсан),
«Ауыл» (9 желтоқсан),
«Астана» (10 желтоқсан),
«Білім» (11 желтоқсан),
«Денсаулық» (12 желтоқсан),
«Серпін» (13 желтоқсан),
«Мемлекеттік тіл» (14 желтоқсан),
«Отан» (15 желтоқсан)
деген атаулар берілген. Ел газеті «Егемен Қазақстан» осы жұлдызды жиырма күннің бәріне де айқарма беттер арнап, олардың мән-маңызын ашып көрсететін болады.
