Кеше Орталық сайлау комиссиясының төрағасы Қуандық Тұрғанқұловтың төрағалық етуімен Комиссияның кезекті отырысы өтті. Отырыста Орталық сайлау комиссиясы Президенттің Жарлығымен тағайындалған Парламент Сенатының депутаттарын тіркеді және Қазақстан Республикасы мәслихаттарының депутаттығына кандидаттардың республикалық бюджет қаражатынан жабылатын шығыстарының нормативтерін бекітті.
Қазақстан Республикасы Президентінің 2011 жылғы 23 қарашадағы «Қазақстан Республикасы Парламенті Сенатының депутаттарын тағайындау туралы» Жарлығының негізінде Орталық сайлау комиссиясы Икрам Адырбековті, Мұхтар Алтынбаевты, Берік Имашевті, Қайрат Мәмиді, Бауыржан Мұхамеджановты, Ерлан Нығматулинді және Людмила Полторабатьконы Қазақстан Республикасы Парламенті Сенатының депутаттары ретінде тіркеді. Одан соң Комиссия төрағасы Парламент Сенатының тіркелген депутаттарына тиісті куәліктер мен омырауға тағатын белгілерді тапсырды.
– Президенттің Жарлығымен екінші мерзімге сенатор болып тағайындалдық, – деді Мұхтар Алтынбаев куәліктер мен омырауға тағатын белгілерді тапсыру рәсімінен кейін журналистерге берген сұхбатында. – Бұл бізге жүктелген үлкен міндет және сенім. Біз Елбасының алдында, Қазақстан халқының алдында өзімізге жүктелген міндет пен сенімді ақтаймыз.
Комиссия отырысында, сондай-ақ Қазақстан Республикасы мәслихаттарының депутаттығына кандидаттардың республикалық бюджет қаражатынан жабылатын шығыстарының нормативтері де бекітілді. Қуандық Тұрғанқұловтың айтуынша, Ортсайлауком қабылдаған қаулы бойынша заңға сәйкес облыстық, Астана және Алматы қалалық мәслихаттардың депутаттығына кандидат ретінде тіркелген әрбір үміткерге үгіт шаралары мен көлік шығыстарына бюджеттен 349 мың теңге, ал қалалық және аудандық мәслихаттардың депутаттығына кандидаттар үшін 179 мың теңге бөлінетін болады. Оның сыртында әрбір тіркелген мәслихат депутаттығына кандидат сайлауалды үгіт жүргізу үшін өзінің сайлау қорын да құра алады.
Отырыста Ортсайлауком алдағы сайлауда қолданылатын сайлаушылар тізімінің нысаны мен учаскелік сайлау комиссиясының сайлау учаскесінің ашылуы туралы хаттамасының нысанын бекітті және Мәжіліс депутаттарының кезектен тыс сайлауы бойынша сайлау бюллетеньдерін «Қазақстан Республикасы Ұлттық банкінің Банкнот фабрикасы» шаруашылық жүргізу құқығындағы республикалық мемлекеттік кәсіпорнында әзірленеді деп шешім қабылдады. Ал мәслихат депутаттарын сайлау бойынша сайлау бюллетеньдерін төрт өңірлік ұйым – Ақмола, Қостанай, Солтүстік Қазақстан облыстары мен Астана қаласы үшін – Астана полиграфиясы, Шығыс Қазақстан, Қарағанды, Павлодар облыстары үшін – «Арко» ЖШС, Алматы, Ақтөбе, Атырау, Маңғыстау облыстары мен Алматы қаласы үшін – «АБК» ЖШС-ның баспаханасы, Жамбыл, Батыс Қазақстан, Қызылорда және Оңтүстік Қазақстан облыстары үшін – «Сенім» баспа орталығы басып шығаратын болады. ОСК хатшысы Бақыт Мелдешовтың хабардар етуінше, барлық бюллетеньдер қажетті қорғану деңгейінде қамтамасыз етіледі.
Отырыстан соң өткен брифингте Қ.Тұрғанқұлов БАҚ өкілдерін сайлау науқанының барысымен де таныстырды. Төрағаның атап өтуінше, қазіргі уақытта мәслихаттар депутаттағына 10 кандидат ұсынылған. Олардың біреуін Қызылорда облыстық мәслихаты депутаттығына кадидат ретінде қоғамдық бірлестік, ал 9 үміткер өз кандидатураларын Маңғыстау облысы Бейнеу аудандық мәслихатына кандидат ретінде ұсынған. Әлисұлтан ҚҰЛАНБАЙ.