Кездесу барысында Кәрім Мәсімов және Николай Азаров Қазақстан және Украина арасындағы экономикалық қарым-қатынасты нығайту қажеттілігін атап айтты. «Арамызда қалыптасқан қарым-қатынастар екі елдің алға қарай дами түсуі үшін, азаматтарымыздың бақуатты тіршілік етуі үшін бізге ашық және әділ әңгіме айтуға, барлық мәселелер бойынша шешімдер табуға мүмкіндік беруде», – деді К.Мәсімов өзінің украиналық әріптесімен болған кездесуде. «Әлемде қалыптасып отырған бүгінгі жағдай сарабдал бағытты талап етеді. Менің ойымша, біздің ынтымақтастығымыз көптеген елдердің экономикасында қазір байқалып отырған тәуекелдерді азайтуға мүмкіндік береді», – деді өз кезегінде Қазақстанды әлеуметтік-экономикалық дамудағы жақсы жетістіктерімен құттықтай отырып Украина Үкіметінің басшысы Н.Азаров.
«2011 жылы Украина мен Қазақстанның іс-қимылдар жоспарының – біздің сауда-экономикалық қарым-қатынастарымыздың көрсеткіштерін арттыруға сеп болған құжаттың мерзімі аяқталды. Енді 2012-2013 жылдарға арналған іс-қимылдар жоспарын жасау керек деп ойлаймын», – деп атап өтті Н.Азаров. Келіссөз аяқталғаннан кейін Кәрім Мәсімов пен Николай Азаров Қазақстан және Украина ішкі істер министрліктерінің арасындағы Ынтымақтастық туралы келісімге қол қою рәсіміне қатысты.
Одан кейін журналистермен өткен брифингте Үкімет басшылары екіжақты келіссөздердің қорытындысын шығарды.
Қазақстан Үкіметі басшысының айтуынша, украиналық әріптестермен әңгіме бейресми және өте нақты мазмұнда өтіп, екіжақты ынтымақтастықтың ауқымды мәселелері тиянақты талқыланған. Атап айтқанда, ғарыш саласындағы өзара іс-қимыл мәселесі сөз болды. К.Мәсімовтің пікірінше, «бұл салада табысты ынтымақтастыққа мүмкіндік мол». Украинамен атом энергетикасы саласындағы ынтымақтастық тақырыбы да назардан тыс қалған жоқ. «Бұл салада Украинаның тәжірибесі зор», – деп атап көрсетті Премьер-Министр. Бұдан өзге Кәрім Мәсімов украиналық кәсіпорындарды Қазақстанның индустрияландыру бағдарламасына атсалысуға шақырды.
«Қазақстан біздің Ресей Федерациясынан кейінгі ірі сауда-экономикалық серіктесіміз. Бұған екі елдің Президенттерінің, Үкіметтерінің біздің ынтымақтастығымызға үлкен көңіл бөлуінен кейін қол жеткізілді», – деп мәлімдеген Николай Азаров Қазақстанның индустрияландыру бағдарламасына өздерінің қатысуға дайын екендіктерін жеткізді.
Келіссөздер барысында қол жеткізілген барлық келісімдер 2012-2013 жылдарға арналған іс-қимылдар жоспарын немесе 4-Жол картасын әзірлеуге негіз болады. Тараптар олардың атқарылу барысын Үкіметаралық комиссия тетігі арқылы бақылауға келісті.
Түстен кейін екі елдің премьер-министрлері Қазақстан-украин бизнес-форумының ашылуына қатысты. Премьер-Министр Кәрім Мәсімов украиналық кәсіпкерлерді Қазақстанға жұмыс істеуге шақырды. Меніңше егер украиналық компаниялар Қазақстан аумағында жұмыс істеуге ниет білдірсе, біз әрине, сіздердің келулеріңізге қуанышты боламыз», – деді Астанада өткен қазақстандық-украиналық бизнес-форумда украиналық компаниялардың өкілдеріне арнаған сөзінде К.Мәсімов. Премьер қазіргі уақытта республикада бизнесті қолдау бойынша бірқатар бағдарламалар жүзеге асырылуда екендігін де еске салды. Атап айтқанда, бірқатар жеңілдіктер қарастырылған «Бизнестің жол картасы» әрекет етуде.
2010 жылдың қорытындысы бойынша Қазақстан мен Украинаның арасындағы сауда айналымы 2,066 млрд. АҚШ долларын құрады. 2011 жылдың 8 айында Қазақстан мен Украинаның арасындағы сыртқы сауда айналымы 2,9 млрд. долларға жетті және 2010 жылдың сәйкес кезеңімен салыстырғанда 1,5 есеге артты. Украинаға қазақстандық өнімдердің экспорты 1,8 млрд. долларды құрап, 2010 жылмен салыстырғанда 4 есеге көбейгені байқалды. Ал Украинадан Қазақстанға импортталған тауарлар көлемі 1,1 млрд. долларға жетіп, 2010 жылдың сәйкес кезеңімен салыстырғанда 30 пайызға артқан.
Қанат ЕСКЕНДІР.