Атап-атап айтқанда, талай елдің арзан несиеге қолы жетпей тұрғанда, оны 7 пайызға түсіремін дегені өте құптарлық жағдай болды. Және 25 жылға беріледі деген сөз, бүкіл кәсіпкерлеріміздің қолын шешкен сияқты. Тіпті осы бастамадан қазірдің өзінде қанаттанып, шағын және орта бизнесін бастап кетуге тәуекелге барғысы келетіндер бірден көбейеді. Бұл жаңа кәсіпкерлерге жол ашып беретін жаңа мүмкіндік, ең басты бағдарлама деп айтуға болады.
Осыдан кейін Қазақстанды 2022 жылға дейін толық газбен қамтамасыз ету жоспары жүзеге асырылғалы отыр. Осы уақытқа дейін еліміз көгілдір отынмен толық қамтамасыз етілген деп ойлайтындар бар. Шын мәнінде газды пайдаланып отырғандар 50 пайыз ғана екен. Оның өзінің анық жоспары жасалуы, газ құбырлары қай қаладан қай қалаға қарай жүреді, нақты қалай іске асады, осының бәрі өзекті.
Мемлекет басшысы 2025 жылға қарай көмір отынынан арылуымыз керек деді. Өйткені ол біздің ауамызды былғап жатыр. Астананың өзінде де көмір отынды пайдаланатындар көп. Қысқасы, көмірден біржолата бас тартып, яки болмаса сапасын арттырсақ жақсы болар еді.
Елбасының бір сөзі ұнап қалды. Өзіміз де солай ойлап келдік қой. Сарыарқаның сары желі елордамыздың түтінін тазартып отырады деуші едік. Сөйтсек, олай болмай шықты. Сарырқаның сары желі көліктерден будақтаған көк түтінді қуып үлгере алмайды екен. Енді осыдан құтылатын болдық.
Әсіресе, Теміртау қаласының экологиясын жақсы білеміз. Аппақ қардың үстіне қара бояу жағылғандай ауасы лас. Халық қалай күн көріп отыр?
Осының барлығынан да Президент хабардар. Елбасы енді осы түтіннен құтылудың анық жоспарын жасап берді. Парламенттің қос палатасы осыны қолдады. Біз де қос қолдап қолдап отырмыз. Және осы мәселеден құтылудың жаңа жолдары, жаңа тәсілдері атап көрсетілді.
Сол сияқты студент жастардың жатақхана мәселесін 2022 жылға қарай толық шешіп боламыз дегені жүзеге асатын болса, Қазақстан еңсесі биік елдің біріне айналар еді. Мен осыған қатты қуандым.
Ал әдебиет пен мәдениеттің әңгімесі бұрыннан да айтылып келеді. Алдыңғы жолдаулардың бәрінде қамтылды. Алайда алдымен халықтың әл-ауқаты, алдымен экономика көш бастауы керек.
Біз өз бағдарымызды әлеуметтік мемлекет ретінде қайта қарастыруымыз қажет. Ол үшін жалақысы төмен адамды салықтан біржолата босату немесе айлық көлеміне қатысты көлемін азайту көп адамға демеу болады. Мұндай жеңілдіктер талай жанның тіктелуіне септеседі. Қуанған да, қолдаған да бастаманың тағы бірі осы!
Айтқандай, Елбасы оқу орындары, білім саласына қатысты қордаланған мәселелерді реттеуді анық тапсырды. Өйткені білім саласы мен Ұлттық ғылым академиясының айналасында дау көп. Қазақ ғылымы үш жылда бір-ақ рет берілетін грантқа қарап қалды деген сөздің жаны бар. Ғалымдарды шулата бермеу үшін осының бәрін қайта қарайтын кез әбден келді. Артық, орынсыз айтыла беретін дау-дамайға тоқтау салу үшін ғылым мен білім саласына қосымша грант беру мәселесі түбегейлі шешілетін болды.
Сондықтан бұл саланың да көңілін көншітіп, қажеттіліктерін қанағаттандыратын іргелі бастамалар қолға алынды.
Ең бастысы, халықтың алдында жария етілген Үндеу толығымен жүзеге асады деп сенеміз. Үкіметке де нақты тапсырмалар берілді. Қалған үмітіміз енді – Үкіметте!
Дулат ИСАБЕКОВ,
Мемлекеттік сыйлықтың лауреаты, жазушы-драматург
АЛМАТЫ
