Полицейлер жарты миллион теңгені иесіне берді

Оған әлеуметтік желілерде айтылатындай, азаматтар мен полицияның арасындағы өзара түсініспеушілік оқиғалары да себеп болады. Бірақ полиция қызметкерлерінің адамдарды қорғауда өмірін де қиып жі­беретін ерлігі немесе күн­делікті тәртіп сақтаудағы игі істері туралы желілерде көп­­шіл­іктің жақ ашпайтыны таң­ғал­дырады. Өзім іздеп, по­ли­цейлердің атына жазылған бір жылы сөз таба алмадым.

Полиция қызметкерлерін дайын­дағанда, ең алдымен, олардан адамгершілік пен адалдық талап етіледі, осы жақсы қасиеттерді бойына сіңіру үшін оқу орны тара­пынан көп жұмыстар жүр­гі­зі­леді. Жақында ғана соның қайтарымындай бір оқи­ға орын алды. Шырақбек Қа­был­баев атындағы Қостанай ака­демиясының қызметкері, полиция майоры Ерболат Қайнар мен магистратураның бірінші курс магистранты, полиция капитаны Нұрдәулет Мырзазияев көшеде келе жа­тып әмиян тауып алады. Олар әмиян ішіндегі жарты миллион теңгесімен иесін тау­ып, қайтарып береді. Бұл адам­гершілік, имандылық емей немене?!

– Біз туысқан інім Нұр­дәу­лет екеуміз келе жатып, үй­дің жа­нында жерде жатқан әмиян­ды тауып алдық. Басында алу­ға қымсынғанымыз шын­дық. Өйткені қазіргі заманда аяқтан шалатын адамдар да болады ғой. Бірақ көпке топырақ шашудан аулақпын. Дегенмен сондай істің құрбаны болмайық деген оймен сәл кідіріс жасадық та, қарау керек деп шештік. Нұрдәулет жерде жатқан әмиянды көтеріп алып, ішінде құжаты бар ма деп қарады. Ашсақ, әмиянның ішінде 500 мыңнан астам теңге және әмиян иесінің төлқұжаты, бас­қа да жеке құжаттары бар екен. Екеуміз дереу әмиян ие­сін іздестіріп, таныс-та­мыр­лар­ға ғаламтордағы әлеуметтік желі­лер арқылы жазып, қоңырау шалып, 2-3 сағаттай іздестіру шараларын жасап, иесін тауып алдық. Телефон арқылы сөйлескенде әмиянды жоғалтып алған адам оны қайда түсіріп алғанын есіне түсіре алмай қатты қиналды. Сосын біз әмиянды тауып ал­ғ­а­нымызды айтып, сүйінші сұ­рап, оны қайтарып беруге кез­десетін жерді белгіледік. Бір­шама уақыттан соң күткен кісіміз келіп, әмиянын қарап, ішін тексеріп, ақшасы мен құ­жаттарының орнында бол­ға­нына қуанышын білдірді. Міне, осылай кішкентай ғана жақсылық жасаймыз деп, Нұржан (әмиянның иесі, ол аты-жөнін толық жазбауды өтінді) бауырымыздан үлкен алғыс алдық, – дейді Ерболат Қайнар.

Ал әмиян иесі Нұржан:

– Менің академия қызмет­кер­лері Ерболат пен Нұрдәулет бау­ырларыма алғысым шексіз. Егер де қомақты соманы маған қай­тармағанда не болар еді? Қазақта «қуған жетпейді, бұйыр­ған кетпейді» деген жақ­­сы сөз бар ғой. Мұның иман­­­жүзді адамдардың қолы­на түс­к­енін, маған қайта бұйыр­ға­н­ын үйдегі бала-шағамның не­сібесі, өзімнің ақ-адал малым екен деп білдім. Бұл жігіттер қоғамдағы полицияның беде­лін арттыруға үлкен үлес қосты деп ойлаймын, – деді.

Міне, жарты күнге созылған жар­ты миллион теңгенің оқи­ғасы осылай жақсылықпен аяқ­талғаны үлкен абырой болды, баршамызды қуантты.

Мейрам ОСПАНОВ,

ІІМ Ш.Қабылбаев атындағы Қостанай академиясының баспасөз хатшысы

ҚОСТАНАЙ