Алматыда ел Тәуелсіздігінің 20 жылдығына орай Білім және ғылым министрлігі мен Қазақ ұлттық аграрлық университетінің ұйымдастыруымен «Халықаралық ғылым мен білім қоғамдастығына серпінді интеграциялау» атты халықаралық семинар өтті. 70 мемлекеттен делегаттар қатысқан екі күндік жиында ұлттық компаниялар, жоо және ғылыми мекемелердің, халықаралық ұйымдар, мемлекеттік құрылымдардың өкілдері әлемдік білім беру жүйесі мен ғылыми кеңістігінде университетаралық және ғылыми орталықтар арасындағы белсенді бірыңғай байланысты дамытуға қатысты резолюция қабылдады.
Алдымен семинарға қатысушылар ел Тәуелсіздігінің 20 жылдығына арналған «ҚазҰАУ: білім мен ғылымдағы инновациялар» көрмесімен танысып, онан соң «Center of Excellence1» модельдік академиялық ұтқырлық орталығының ашылуына және «Tive to study» тіл орталығының тұсаукесер рәсіміне куә болды. Сондай-ақ қонақтардың қатысуымен бір мезетте бірнеше елдің жоғары оқу орындарымен «Глобалды класс. Серіктес жоо-лармен байланыс орнату» оn-line тәртібіндегі бейне-конференциясын өткізді.
Пленарлық мәжілісті ҚазҰАУ-дің ректоры Тілектес Есполов ашып, алқалы жиынның мақсатына тоқталды. Үш тілде өткен жиын аясында панельдік сессия жұмыс істеді. Сонымен қатар жетекші сарапшылар семинарға қатысушыларға және ҚазҰАУ факультеттерінде әртүрлі бағыттарда шеберлік-сыныптарын өткізді.
Семинар бағдарламасында Тәуелсіздігінің 20 жылдығына арналған ҚазҰАУ студенттер ұйымы дайындаған «Тәуелсіз елім – тағдырым» атты мәдени шара көрсетілді.
Гүлзейнеп СӘДІРҚЫЗЫ.