Кеше Астанадағы Тәуелсіздік сарайында «Нұр Отан» ХДП-ның кезектен тыс ХІV съезі өтіп, партияның сайлау алдындағы тұғырнамасы мен партиялық тізімі анықталды. Оның жұмысына Елбасы, партия Төрағасы Нұрсұлтан Назарбаев қатысып, сөз сөйледі.
Съезге 850 мыңға жуық мүшесі бар «Нұр Отан» ХДП-ның барлық өңірлердегі филиалдары мен бөлімшелерінен 600-ден астам делегат қатысты. Олардың көбі елімізге танымал, Тәуелсіз Қазақстанның іргесінің нығаюына үлес қосқан адамдар.
Съезд жұмысын партия Төрағасының бірінші орынбасары Нұрлан Нығматулин кіріспе сөзбен ашты. Ол алдымен съездің ресімдік мәселелерін ортаға салып, жұмыс тәртібін делегаттардың дауыс беруімен бекіттіріп алды. Соның ішінде екі мәселеден тұратын күн тәртібі бекітілді. Бірінші мәселе – «Нұр Отан» ХДП-ның: «Қазақстан. 2017 жылғы кезеңге дейінгі мақсаттары. Ұлттық іс-қимыл жоспары» атты сайлауалды тұғырнамасы туралы болды. Екінші мәселе – Парламент Мәжілісі депутаттарының сайлауына партия атынан түсетін мүшелердің тізімін бекітуге арналды. Депутаттардың бірауыздан қолдауымен күн тәртібі бекітілді.
Бірінші мәселе бойынша сөз Қазақстан Республикасының Президенті, «Нұр Отан» ХДП Төрағасы Нұрсұлтан Назарбаевқа берілді (Президент Н.Назарбаевтың сөзі бөлек беріліп отыр).
Елбасы, партия Төрағасы Н.Назарбаев сөзін аяқтаған соң Нұрлан Нығматулин «Нұр Отан» көшбасшысының партия алдына қойып отырған нақты тапсырмалары сөзсіз орындалатынына делегаттар атынан сенім білдірді.
Жарыссөзге алғашқы болып Алматы қаласының әкімі, партияның қалалық филиалының төрағасы Ахметжан Есімов шықты. Тәуелсіздігіміздің алтын бесігі – Алматы жұртшылығының ыстық сәлемін әкеліп тұрмын, деп бастады ол өзінің сөзін. Бүгінгі Елбасы жариялаған тұғырнама баршамыздың көңілімізден шығып отыр. Елді жаңа жеңістерге бастайтын бұл тұғырнаманы біз толығынан қолдаймыз. Оны жүзеге асыруға біздің мүмкіншіліктеріміз әбден жетеді. Мемлекетіміз нық, экономикамыз қуатты, елімізді үлкен асулардан өткізетін сара жолымыз, дана басшымыз бар.
Одан әрі «Нұр Отан» партиясының өткен парламенттік сайлауда белгілеген бағдарламасын толық жүзеге асырғанын айта келіп, осы жоспар шеңберінде Алматыда жүргізілген жұмыстарға тоқталды. Соның ішінде үдемелі индустриялық-инновациялық бағдарламаны іске асыру нәтижесінде 90 мың жаңа жұмыс орындары ашылғанын, ІЖӨ-нің жан басына шаққандағы көлемі 19 мың АҚШ долларына жеткенін, 2009 жылы мемлекеттік бюджетке түсетін түсім 638 млрд. теңге болса, былтыр ол 702 млрд. теңге құрағанын, ал биыл 1 трлн. теңгеге жуықтайтынын айтты. Демек, соңғы екі жыл ішінде салық түсімі де бір жарым есеге өскен. Қала тұрғындарының әл-ауқаты жақсарып келеді, орташа айлық жалақысы 125 мың теңгеге жетті. Экономикамыз өркендеген сайын қоғамдық тұрақтылықтың іргесі нығая түсуде. «Нұр Отан» партиясы осындай игілікті жұмыстардың көш басында тұр, деді ол. Әлеуметтік зерттеулер бойынша, алматылықтардың партияға деген сенімі 89 пайызды құрайды. Бұл ең алдымен партия басшысы Н.Назарбаевқа деген биік сенім көрініс.
Одан әрі шешен Президенттің әрбір қазақстандықтың қалтасында үш кілт: жекеменшік пәтерінің, автомәшинесінің және жұмыс орнының кілттері болуы керек деген сөзін еске ала отырып, осы талаптың Алматыда қалай орындалып жатқанына тоқталды. Алдымен пәтер мәселесіне тоқталайын, деді ол. Соңғы үш жылда қалада 2,6 млн. шаршы метр тұрғын үй пайдалануға берілді. Мұндай құрылыс қарқыны қала тарихында бұрын болып көрмеген. Қазір қаланың әрбір тұрғынына 20,3 шаршы метр тұрғын үйден келеді. Ал автомобильмен қамтамасыз етілуге келетін болсақ, Алматының әрбір ересек тұрғынына ол 1,6 данадан келеді. Енді үшінші кілт, яғни тұрғындардың жұмыспен қамтамасыз етілуіне келетін болсақ, 2009 жылдан бері қалада жаңадан 90 мың жұмыс орны ашылды. Қазір жұмыссыздық 5,6 пайызға дейін төмендеп, тәуелсіздік жылдарындағы ең төменгі деңгейге жетті.
Маңғыстау облысы ардагерлер кеңесінің төрағасы Өмірзақ Озғанбаев Тәуелсіздіктің 20 жылдығын ең ұлы мереке ретінде ауызға алды. Одан әрі Тәуелсіздіктің елең-алаңында өзінің де мемлекеттік қызметтерде болып, қызығы да, қиындығы да көп 90-шы жылдардың басында Елбасының командасында тізе қосып бірге еңбек еткенін айтып өтті. Сол жылдарды өз өмірімнің ең тәтті және ең бақытты жылдары деп санаймын, дей келіп, шешен сол уақыттарда Елбасының күні-түні тыным таппай жұмыс істегендігінің куәсі болғанын еске алды. Ол еліміздің барлық аумақтары ғана емес, алыс-жақын шет елдердің бәріне шығып, тәуелсіз Қазақ елін танытып, оларды экономикалық ынтымақтастыққа, саяси әріптестікке шақырып, тыным таппай жүрді. Соның арқасында экономикамызға миллиардтаған доллар инвестиция құйылып, ол жоғары қарқынмен дамыды, еліміз саяси жағынан болжамды, тұрақты ел ретінде әлемге танылды. Енді бүгінгі күні Қазақстанды, оның жас елордасы – Астананы білмейтін адам кемде-кем, деді шешен.
Одан әрі ол Тәуелсіздіктің 20 жылында жеткен жетістіктерге қысқаша шолу жасай келіп, олардың бұрын ешқашан да болмаған ғажайып екендігін атап өтті. Соның ішінде әлемдік саясатқа араласып, барлық әлемді мойындатқан бастамалар мен ұсыныстар жасағанын, Еуропаның аса беделді ұйымы – ЕҚЫҰ-ның төрағасы болғанын айта келіп, бұл уақыт Қазақстан тарихының «алтын ғасыры» болып танылатыны сөзсіз екенін атап көрсетті. Сөзінің соңында шешен «Нұр Отан» ХДП Төрағасының бүгін белгілеп отырған тұғырнамасының да мүлтіксіз орындаларына сенім білдірді.
Келесі сөз Қостанай облысы «Иволга-холдинг» ЖШС Бас директоры Василий Розиновқа берілді. Біздің еліміз үнемі жақсылыққа қарай өзгеріп, экономикамыз қарышты қатты дамып, әл-ауқатымыз күннен-күнге артып келеді. Біз – қазақстандықтар тұрақтылық пен өзара сыйластыққа ешқашан қаяу түсірмей, аталарымыз салып кеткен сара жолды берік ұстанып келеміз, деді ол өзінің сөзінде. Оған 20 жылғы Тәуелсіздік жылдарымыз куә. Біз осы жылдарда Президент Н.Назарбаевтың бастауымен асыл қазыналарымыздың іргесін нығайта түстік. Одан әрі шешен өзінің шаруашылығы мен қол жеткен табыстарына тоқталды. Бүгінгі күні біздің өнімдеріміз әлемдік рыноктағы бәсекелестікке төтеп бере алады. Ең бастысы – біздер, қазақстандықтар өз күштерімізге сеніп, өзіміздің қолымыздан іс келетініне көзімізді жеткіздік, деді ол.
Біздің аграрлық кәсіпорнымызда 10 мыңдай адам қызмет етіп, тұрақты еңбекақы алып тұрады. Осының бәріне Президент Нұрсұлтан Назарбаевтың аграрлық салаға үлкен көңіл бөліп, қамқорлық жасағандығының арқасында қол жетіп отыр. Бұл орайда өз ұжымымның Президентке деген деген шынайы құрметін жеткізгім келеді, деген шешен одан әрі, биыл, соңғы 50 жылда болып көрмеген рекордты астықтың Қазақстан Тәуелсіздігінің 20 жылдығына тарту екенін және оның Елбасы Н.Назарбаевқа арналатынын мәлімдеді. Сөзінің соңында «Нұр Отанның» жаңа міндеттер жүктеп отырғанын айта келіп, біз бұрынғы сайлауда берген уәдемізді толық орындағандықтан, сайлаушының бетіне ұялмай, тура қарай аламыз. Жаңа сайлау алдында белгілеп отырған тұғырнаманың да сөзсіз орындалатынына олардың күмәні болмасын, деді.
Мінбеге көтерілгендердің бірі «Атамекен» ұлттық экономикалық палатасының басқарма төрағасы, сауда-өнеркәсіп палатасының президенті Абылай Мырзахметов өз сөзінде Мемлекет басшысының ұдайы қамқорлық көрсетуінің арқасында елімізде қолайлы кәсіпкерлік ахуал қалыптасқанын, соның арқасында шағын және орта бизнес өкілдері дағдарысты еңсеріп қана қоймай, экономикамыздың өрлеуіне тиімді жұмыс істегенін жеткізді. «Сіз 1999 жылы «Нұр Отанның» бірінші съезінде отандық кәсіпкерлікті қолдау бағытында нақты тапсырмалар жүктеген едіңіз. Олар мүлтіксіз орындалып келе жатқанын салтанатты түрде мәлімдеймін. Салықтардың азайтылуы, әкімшілік кедергілердің жойылуы, рұқсат лицензиялардың қысқартылуы – кәсіпкерлер мүддесін ойлаудан туған шаралар. Одан бергі уақытта елдің жалпы ішкі өнімінің үздіксіз өсуіне зор үлес қосты. Ол бүгінгі таңда 30 пайыздан астамын құрайды. Қазір 1,2 миллионнан астам шағын және орта кәсіпкерлік субъектілері жұмыс істейді».
Палата басшысы партияның сайлауалды Тұғырнамасында бизнес саласын дамытудың жаңа тетіктерінің ұсынылғанын, нық мақсаттарға ұмтылдырудың нақты міндеттері қарастырылғанын атады. Елде күшті кәсіпкерлік класты қалыптастыру – басым бағыттардың бірі. Экономикамыздың қозғаушы күші ретінде әлеуетін күшейту жолдарын белгілеу экономикалық өсудің басты нәтижесі табыстың артуына ықпалдылығы арта түсетін болады.
«Бизнестің жол картасы-2020» бағдарламасын орындау өңірлік кәсіпкерлікті дамытып, теңгерімді өсуіне және жаңа жұмыс орындарын құруға әкеледі. Алдағы жылдары 1,5 миллиондай адамды жұмыспен қамтуға мүмкіндік береді. Өзін-өзі жұмыспен қамтамасыз еткендердің үлесі экономикалық белсенді халықтың жалпы санында 33,3 пайыздан 26 пайызға дейін азайтылады. Жаңа парламенттік мерзімде атқарылатын істер Президенттің 2020 жылға дейінгі даму стратегиялық бағдарламасымен тығыз сабақтас. А.Мырзахметов ойын түйіндей келіп, кәсіпкерлер алдағы уақытта да бар күш-қайратын елдің, халықтың игілігіне арнайтынына сенім білдірді.
«Қазфосфат» минералды тыңайтқыштар ЖШС-нің аға ауысым шебері Болатхан Көптілеуов Қазақстанның жетістіктерін Н.Назарбаевтың есімімен тікелей байланыстыратынын, атқарылып жатқан ұлан-ғайыр жұмыстарға халықтық партияның сайлауалды міндеттемелері тікелей ықпал жасағанын тілге тиек етті. «Мен қарапайым жұмысшымын. Құрметті Нұрсұлтан Әбішұлы, мен де Сіз сияқты еңбек жолымды өндірістен бастадым. Мінезімді өндіріс шыңдады деп едіңіз бірде. Бізге аз сөйлеу, көп іс тындыру тән. Сіз Төрағалық ететін «Нұр Отан» партиясы да нақты іс-қимыл ұйымы екенін сан мәрте дәлелдеп келеді. Кезінде халықтық Тұғырнаманың барлық баптары уақытынан бұрын орындалды. Миллионнан астам отандастарымыз жұмысқа орналасты. Зауыттар мен фабрикалар салынып жатыр. Халық тіршілігі біршама жақсарды. Бір сөзбен айтқанда, айтылды ма – істелді! Сондықтан да, біз әрқашан, Елбасы партиясы «Нұр Отанды» қолдаймыз! Жиырма жылда жеткен жетістіктеріміз ұлан-ғайыр. Партиямыздың нақты әрі айқын іс-әрекет жоспары, мемлекетіміздің әрбір азаматының мүддесін қорғайтын Тұғырнамасы – алдағы сайлаудағы шынайы жеңісіміздің, болашақ жетістігіміздің кепілі», деп сөзін «Елін сүйген Елбасымен біргеміз!» деген жыр жолдарымен аяқтады.
Көкшетау университетінің магистранты Алена Герасимова өзін нұротандықтар сапында болғанын мәртебе, құрмет санайтынын, 2007 жылы сайлауға алғаш қатысқаннан бері «Жастар саясаты» бағдарламасына, партияның саяси шараларына үзбей атсалысып келе жатқанын айтып берді. Өткен президенттік сайлауда 85 мыңға тарта жас көмекшілер қатарынан табылып, өмірінде ұмытылмастай сақталып қалыпты. «Сіздің бастауыңызбен халқымыз талай сындардан мүдірмей өтті. Қанша қиындық кезіксе де мұқалмады, мойымады. Тығыз бірліктің, асқан ұйымшылдықтың үлгі-өнегесін көрсетті. Қоғамдағы татулық алға жетелеп, шынайы жеңістерге бастады. Бәріміз «Қазақстан – Отаным» деген бір ғана асқақ ұғыммен өмір сүреміз. Кең-байтақ еліміздің ендігі тарихын біз – жастар жасайтын боламыз. Сіздің жарқын бастамаларыңыз бен алға қойған мақсаттарыңыздың барлығы түптің-түбінде жастар игілігін көздейді. Біз оған лайықты істермен жауап беруге әрқашан дайынбыз. Партияның сайлауалды бағдарламасы өмірлік маңызды мәселелерді алға тартумен құнды», деді.
Зілтемір көтеруден Пекинде өткен ХХІХ жазғы Олимпиада ойындарының және әлемнің үш дүркін чемпионы Илья Ильин мінберге көтерілгенде, зал ішін ду шапалақ көміп кетті. Жиналғандар жуырда өткен әлем чемпионатында Қазақстанның Әнұранын ойнатып, көк байрағын көкке желбіреткен батыр оғланына риясыз құрметін осылай білдірді.
Ол өз сөзін көтеріңкі үнмен бастады. Оның жоғары эмоциялық көңіл-күйін түсінуге болады. Жаны жабырқап, қиналған шақтарда тікелей Елбасыдан қолдау тапқанын өзі де жасырмады. «Мен спорттық жетістіктеріммен емес, Нұрсұлтан Әбішұлындай Президенті бар Тәуелсіз еліммен мақтанамын. Осындай елде тұрғанымды үлкен бақыт санаймын. Париж төрінде алтыннан алқа таққанда құттықтауыңызды алып, төбем көкке жеткендей болды. Сол жеңісімді Президентіме, еліме арнадым», дегенде зал тағы да дүркірете қол соқты.
Даңқты спортшы шетелдерге жиі шығатынын, Отанына деген махаббат, қазақстандықтардың қолдаулары жігеріне жігер қосып, үнемі жеңістерге жетелейтінін айта келіп, келесі жеңісіміз алдағы сайлау болсын, деген ақ тілегін жолдады.
Съезде сөйлегендердің ең соңғысы Жастар сыйлығының лауреаты, актер Нұрлан Әлімжанов болды. Ол өзінің кинода Елбасы Нұрсұлтан Назарбаевтың образын сомдағанын ауызға алды. Оның қаншалықты шеберлікпен орындалғанына баға беру, әлбетте, көрерменнің еншісінде. Алайда сол кездерде бойымды кернеген сезімдер туралы айтып берейін, дей келіп, шешен образды ашу барысында жас Нұрсұлтанның өмірі мен істерін зерттегенін және сол кездерде оның жастайынан іскер, әрқашанда табанды әрі батыл шешімдер қабылдауға дайын тұрғанына тәнті болғанын жеткізді. Сіздің Қазақстан секілді алып елді басқарып, оны кемел болашаққа жеткізетініңіз сол кезде-ақ белгілі болғаны анық. Сондықтан да біз секілді жастар Сіздің соңыңыздан еріп, болашағын Сіз басқарып отырған партиямен байланыстырады, деді ол.
Осыдан кейін съезд жұмысын жүргізіп отырған Н.Нығматулин жарыссөз тоқтатылсын деген ұсыныс түскенін жария етті. Ұсыныс дауысқа қойылып, бірауыздан қабылданды. Сөйтіп, съезд екінші мәселені талқылауға көшті. Партияның Саяси кеңесінде ұзақ талқыланып, дайындалған Мәжіліс сайлауына ұсынылатын кандидаттардың партиялық тізімін Орталық аппарат жетекшісінің орынбасары Құмар Ақсақалов оқып берді. 127 адамнан тұратын тізімде елге барынша белгілі қайраткерлер, танымал тұлғалар көп болып шықты. Мәжілістің бұрынғы депутаттары да аз емес. Делегаттар тізімге толығымен дауыс беріп, оны бекітті. Сөйтіп, партияның кезектен тыс съезі өз жұмысын аяқтады.
-----------------------------------------
Суреттерді түсіргендер С.БОНДАРЕНКО, Б.ОТАРБАЕВ.
