Қоғам өкілдері, өндірістік кәсіпорындар басшылары, ардагерлер және Қазақстан халқы Ассамблеясының мүшелері қатысқан жиында өңір басшысы Ерлан Қошанов әр бастаманың қарағандылықтардың жай-күйінің оңалуына қалай әсер ететінін жіліктеп айтып берді.
Облыс басшысы «Әр отбасына баспана алудың жаңа мүмкіндіктері» бастамасы пәтер кезегін төмендетуге оң ықпалын тигізетінін ерекше атап өтті. Сонымен қатар Президент бастамасының алдағы жылдары кезекте тұрған азаматтар санын азайтып, облыстағы тұрғын үй қорының едәуір жаңартылатынына себепкер болатынын айтты.
Облыс басшысы қала және аудан әкімдерінің алдына тұрғын үй құрылысын белсенді дамыту міндетін қойды. Алдағы уақытта тұрғын үй құрылысы алаңдарына инженерлік-коммуникациялық инфрақұрылымдарды жеткізу үшін жекеменшік құрылысшылармен бірігіп, мемлекет-жекеменшік әріптестігі механизмі қолданыла бастайтынын айтты. Үндеуде көтерілген басқа да міндеттердің орындалу барысы қатаң бақылауда болатынын жеткізді.
Актив жиналысында сондай-ақ облыста студенттік жатақханалардың тапшылығы өткір байқалатыны әңгімеге өзек болды. Өңір басшысы бұл мәселені шешудің жолдарын айтып берді. Бүгінгі күнде облыста күндізгі бөлімде оқитын 25 мың студенттің 13 мыңнан астамы мемлекеттік грант бойынша білім алуда. Енді Елбасы бастамасының арқасында олардың саны 35-40 пайызға артпақ.
Мемлекеттік гранттарды үлестіру үшін қысқа мерзім ішінде аймақтың қандай білікті кадрларға мұқтаж екендігін анықтау өте маңыз беретін шаруа екендігіне тоқталды облыс басшысы. Сонымен қатар студенттерді жатын орынмен қамтамасыз ету де шешімін тез табуды қажет ететін мәселе.
Осы орайда Е.Қошанов ЖОО басшыларын алдағы уақытта жобалау-сметалық құжаттамаларды әзірлеп, инвестор іздестіру ісімен шындап айналысуға шақырды. Өңір басшысы бұл мәселенің ерекше бақылауда болатынын да атап өтті.
Елбасының елімізді әрі қарай көгілдір отынмен қамтуды жалғастыру бастамасы Қарағанды облысының тұрғындары үшін де үлкен маңызға ие. Жоба аясында Қарағанды, Теміртау, Жезқазған, Сәтбаев, Саран және Шахтинск секілді облыстың ірі қалалары, сондай-ақ Абай, Жаңаарқа, Бұқар жырау, Осакаров, Шет, Ұлытау аудандарының 120 елді мекені газбен қамтылатын болады.
Президенттің жаңа бастамаларын жүзеге асыру жеке ісін енді бастаған кәсіпкерлер үшін бизнесін дөңгелетіп алып кетуге мол мүмкіндік береді. Қарағанды облысында жүзеге асырылған стартап-жобалардың саны екі есеге ұлғаюы да әбден мүмкін.
– 2017 жылы жаппай кәсіпкерлікті дамыту бағдарламасын жүзеге асырудың бірінші жылында облысымызда ісін жаңа бастап келе жатқан 827 кәсіпкер 4,5 млрд теңге шағын несиелер алды. Бұл оларға ауыл шаруашылығында және өңдеу өндірісінде жаңа кәсіпорындар ашуға, сондай-ақ 700-ден астам жаңа жұмыс орындарын құруға мүмкіндік берді, – деді Е.Қошанов «Шағын несие беруді көбейту» бастамасына тоқтала келе.
Алайда бөлінген қаражат барлық ниет білдірушілерге жеңілдетілген несие алуға жеткіліксіз болды. Тек «Бастау Бизнес» жобасы бойынша ғана оқудан өткен 1313 кәсіпкердің 956-ы қаржылық ресурстардың жеткіліксіздігінен шағын несие ала алмай қалған. Осындай мәселенің туындауына байланысты, Елбасының ағымдағы жылы бұл бағдарлама бойынша қосымша 20 млрд теңге бөлуді тапсырғаны белгілі.
Актив жиналысында облыс басшысы «Жалақысы төмен жұмысшылардың еңбекақысын көбейту бастамасы өңірдің шамамен 160 мың тұрғынына қатысты болатынын айта келіп, шығарылатын қаражаттың шын мәнісінде жұмыскерлердің жалақысын ұлғайтуға бақытталуын қадағалау керектігіне ерекше мән берді.
– «Президенттің бес әлеуметтік бастамасы» біздің облыстың да ілгері дамуына дем беріп, игі ықпалын тигізеді, – деп қорытындылады актив жиналысын облыс әкімі.
Қайрат ӘБІЛДА,
«Егемен Қазақстан»
ҚАРАҒАНДЫ
