Президент азаматтарға 7 пайыздан аспайтын ипотекалық несиелер беріп, қайтару уақытын 20-25 жылға созу, сондай-ақ бастапқы жарнаны 20 пайыздан асырмау басты мәселе екендігін айтты. Тұрғын үй мәселесі бүгінгі күні екінің бірін қынжылтатын, толғандыратын жайт екендігі мәлім. Ал Елбасының осы тұрғыдан қолдауы басым көпшілікке демеу болмақ.
Елімізде жалақысы аз 2 млн-ға жуық адамның әл-ауқатын жақсарту үшін салықтық жүктемені 10 пайыздан 1 пайызға төмендету көзделген. Сәйкесінше, мұндай бетбұрыс біраз отбасының жағдайын жақсартуға көмегін тигізгелі отыр.
Жоғары оқу орындарында жыл сайын бөлінетін 54 мың грант қосымша 20 мыңға көбейтіледі. Бұл оқу орындарының абыройын арттырып және білім саласының деңгейін көтеріп, дамытуға сеп болар сөзсіз. Әсіресе студенттерді жатақxанамен қатамасыз ету олардың сапалы білім алуына өте үлкен әсерін тигізеді.
Ауыл шаруашылығын дамыту аясында шағын және орта кәсіпкерлікке шағын несиелер берудің жеңілдіктері де елді қуантты. Шағын несиелердің көлемін 62 миллиард теңгеге жеткізу көптеген мәселелердің күрмеуін шешеді.
Елбасы өз баяндамасында Қызылорда – Жезқазған – Қарағанды – Теміртау арқылы Астанаға дейін газ құбыры магистралі тартылса, 2,7 млн адам көгілдір отынның игілігін көретінін айтты.
Міне осы бес бағдарды азаматтарымыздың жағдайын жақсартуға бағытталған тарихи бетбұрыс ретінде бағалаймын. Әрине бұл үшін барлық азаматтар бір мақсат, бір мүддемен алға ұмтылулары тиіс.
Икрам ХАШИМЖАНОВ,
«Дустлик» өзбек қауымдастығының төрағасы
