Ел тәуелсіздігінің 20 жылдығы қарсаңында облыс орталығындағы Кутузов көшесі бойында Этномәдени бірлестіктер аллея-алаңы
![291111-3](http://old.egemen.kz/2011img/291111-3.jpg)
ашылды. Осыдан үш жылдай уақыт бұрын «Достық үйінің» пайдалануға берілу салтанатты рәсіміне Елбасы Нұрсұлтан Назарбаев қатысты. Бұл күндері «Достық үйінде» облыстық Қазақстан халқы Ассамблеясының хатшылығы, 18 этномәдени бірлестік, ассамблеяның жастар бірлестігі, ұлттық өркендеу мектебі, «Ана тілі» тілдерді дамытудың оқыту-әдістемелік орталығы, «Қазақ тілі» қоғамы орналасқан. Сонымен қатар, 20 этностың мәдениетін дәріптейтін 42 шығармашылық ұжым жұмыс істейді. Мамыр айында «Мақсаты бірдің – рухы бір» ұранымен «Достық. Бірлік. Тәуелсіздік» атты этностық топтардың ХІV облыстық фестивалі өтті. «Ел қазынасы» жобасы аясында «Ертіс – достық өзені» атты халықаралық фестиваль ұйымдастырылды.
Биылғы жылы этномәдени бірлестіктер жұмысын атқару ісіне 25 миллион теңге бөлінді. Өзге этнос өкілдері мемлекеттік тілді меңгеруде. Облыс аумағында осы бағыт аясында тиісті жұмыстар атқарылуда. Мемлекеттік тілді және қазақ халқының салт-дәстүрлерін үйрету облыстың лингвистикалық лагерьлері мен алаңдарының оқу бағдарламасына енгізілген. Енді, міне, мереке алдында Достық аллеясында шағын түрдегі кескінделген әрбір этнобірлестіктердің ұлттық болмысына сай жасалған мүсіндер орнатылып отыр.
Мысалы, «Ватан» әзербайжан этнобірлестігі – Әзербайжан қалалары бар карта және қыз мұнарасын, гректер – Афродитаның мүсінін, қырғыздар – шаңырақ, қомуз, бүркіттің бейнесін, армяндар – армян сәулет өнерін, славян орталығы матрешкаларын тізіп қойыпты. Әрі қарай поляктар, болгарлар, украиндар, белорустар, корейлер, ұйғырлар жасаған өз халқының ұлттық дәстүрлеріне сай белгілері болып жалғасып кете береді. Аллея ішіне орындықтар қойылған. Бір сөзбен айтқанда, қалалықтар үшін тағы бір демалыс орны ашылды. Еліміздегі ұлтаралық келісімнің, ынтымақтастық пен бейбітшіліктің көрінісі іспетті.
Жиналғандар алдында облыс әкімі Бақытжан Сағынтаев сөз сөйледі. «Еліміз достық пен татулықтың мекеніне айналған. Аллеяның ашылуы бәріміз үшін зор маңызды іс-шара және үлкен мәртебе деп есептеймін», – деді өңір басшысы. Бұдан кейін этнобірлестіктер өкілдері Жафар Махмұдов, Татьяна Кузина, Яна Муравская құттықтау сөз сөйледі.
Фарида БЫҚАЙ,
Павлодар.