Алғашқы екі аптаның қорытындысы айтарлықтай нәтиже беріп отыр. Аталмыш компанияның акциясын Алматыдағы қоғамдық көлікте 60 мыңнан астам адам пайдаланған. Жалпы алғанда, есепті кезеңде SMS арқылы 370 мың төлем жасалған.
«Акцияның алғашқы нәтижесі біз ойлағаннан асып түсті. Клиенттер мен SMS транзакциялар саны өсіп келеді. Жақында тәуліктік рекорд – 100 мың операция жасалды. Техникалық тұрғыдан біз бұл санды екі есе арттыруға дайынбыз», дейді Beeline-Қазақстанның трансформация және стратегия жөніндегі бас директоры Олег Алдошин.
«Алматыдағы қоғамдық көлікте жолақы 1 теңге» акциясы 1 наурызда басталған болатын. Бұл бастама үстіміздегі жылдың 31 мамырына дейін жалғасады. Қызметті Beeline-ның алдын-ала төлем жүйесіне қосылған клиенттер SMS-төлем арқылы пайдалана алады.
Жол ақысын төлеу үшін автобустың немесе троллейбустың ішінде көрсетілген көлік кодын 2505 нөміріне жіберу керек. Телефон теңгерімінен 80 теңге ұсталады да, оның 79 теңгесі бірден теңгерімге қайтарылады. Осылайша, жолақы құны 1 теңгені құрайды. Бұл қызметті қала тұрғындарының барлығы пайдалана алады.
SMS-төлем мен Beeline акциясы қаладағы барлық бағыттағы автобустар мен троллейбустарда қолданылуда.
Алайда акция Алматы қаласындағы жер үстінде жүретін қоғамдық көлікте жүруге ғана жарайды. SMS-төлем үшін теңгерімде ең кемі 80 теңге болуы керек. Акция бойынша тәулігіне ең көбі 3 рет жүруге болады.
Орайы келіп тұрғанда, тұрғындарға жолақыны төлеудің жаңа мәдениетін кіріктіруге бел шеше кіріскен байланыс операторының штаб-пәтері Амстердам (Нидерланд) қаласында орналасқанын айта кетелік. «Veon» халықаралық телекоммуникациялық холдингінің бір бөлігі болып табылады. Қазір «Veon» – абоненттер саны бойынша әлемде жетінші орынды иеленеді. 2017 жылғы үшінші тоқсанның қорытындысы бойынша, компания 235 миллионнан астам абонентке қызмет көрсетеді.
Айнаш ЕСАЛИ,
«Егемен Қазақстан»
АЛМАТЫ
