Мемлекет басшысы ұсынған бес бастаманың алғашқысы – еліміздің әр отбасына баспана алуға мүмкіндік береді. Тұрғын үйге қолжетімділік – бүгінгі күннің өткір мәселесі. Атырау облысында өткен жылы 624,1 мың шаршы метр тұрғын үй пайдалануға берілді, бұл алдыңғы жылмен салыстырғанда 11,7 %-ға артық. Қазір аймақтағы мемлекеттік тұрғын үй қорынан тұрғын үйге мұқтаж азаматтар саны 24,7 мың адам болып отыр. Оның 19,4 мыңы – Атырау қаласының үлесінде. Бұл мұнайлы өңірде тұрғын үй құрылысы бойынша ауқымды міндеттердің тұрғанын және атқарылатын шаралардың көп екенін көрсетеді. Аймақта тұрғын үй құрылысының қарқын алуымен кәсіпкерлік нысандарының қатары көбейіп, жаңадан жұмыс орындары ашылады, адамдардың баспаналы болу мүмкіндігі артып, демографиялық саясатқа да оң ықпалын тигізеді.
Халыққа арнаған Елбасы Үндеуінің екінші бастамасында жалақысы төмен жұмысшылардың еңбекақысын көбейту үшін олардың салық жүктемесін 10 есеге азайту көзделген. Мұның өзі халықтың әлеуметтік жағынан әлсіз топтарына жататын бөлігінің тұрмыс жағдайын жақсартуға бағытталған қолдау деп түсінген жөн.
Үшінші бастама халықтың жоғары білім алуына жағдай жасау, сапалы мамандық иелерін дайындау мен студенттердің жатақханадағы жағдайын жақсартуға бағытталған. Әсіресе студенттерге арналған қосымша гранттар көлемін ұлғайту және оларды жатақханамен қамтамасыз ету өзекті мәселенің бірі болатын. Президент бастамасында келер оқу жылында мемлекеттен қосымша 20 мың грант бөлуді тапсырды. Мұнда ең алдымен инженерлер, ақпараттық технология, нанотехнология саласының мамандарын дайындауға баса назар аударылады. Бұл бастама Төртінші өнеркәсіптік революция жағдайында жаңа экономикаға қажет мамандар дайындауға мүмкіндік береді. Бұл да жастарға мемлекет тарапынан жасалатын қамқорлықтың айқын көрінісі.
Жоғары білім алудың қолжетімділігі мен сапасын арттыру бағытында облыста жоспарлы жұмыстар жасалып та жатыр. Қазір аймақтағы үш жоғары оқу орнында 12 мың студент білім алады. 1,6 мың студент жатақханамен қамтылған. Ал 312 студенттің жатақханамен қамтамасыз ету жөніндегі сұранысын қанағаттандыруға мүмкіндік болмай отыр. Өткен жылы жергілікті бюджет есебінен бөлінген білім беру грантына 750 үміткер қатысып, іріктеу нәтижесінде 222 студент білім беру грантына ие болды.
Айта кету керек, облыстың 25 техникалық және кәсіптік білім беру ошақтарында 17 мыңнан астам студент оқиды. Он колледжде жатақхана бар. Екі мыңға жуық студент жалдамалы пәтерлерде тұрады. Студенттердің тұрмыс жағдайының төмендігі олардың білім алу сапасымен қатар денсаулығына да әсер етеді. Осы мәселені шешу үшін Д.Нұрпейісова атындағы музыкалық колледждің 100 орындық жатақханасының және Аққыстау ауылында 100 орындық жатақханасы бар 320 орындық кәсіптік техникалық колледждің құрылысы жүруде. Бес техникалық және кәсіптік оқу орнының жатақханасы құрылысының қажетті құжаттамалары жасақталды. Биыл «Теңізшевройл» ЖШС «Игілік» бағдарламасы арқылы Атырау қаласында агротехникалық колледжге 150, энергетика және құрылыс колледжіне 100 орындық жатақхана құрылысын салу жоспарлануда.
Халыққа жария етілген Үндеудегі төртінші бастама шағын несие беру мәселесіне арналған. Биыл «Бюджеттің жол картасы-2020» бағдарламасы бойынша бюджеттен 1 980 млн теңге бөлінді, қосымша республикалық бюджеттен 590 млн теңге қарастырылуда. «Жаппай кәсіпкерлікті дамыту» аясында қаладағы кәсіпкерлерді несиелеуге 253 млн теңге бөлініп, 24 жоба қаржыландырылды. Ауыл кәсіпкерлерін қолдау мақсатында да өңірлік бағдарлама бар.
Елбасы Үндеуінде атап көрсеткендей, бұл – елдің игілігіне арналған ұтымды әрі оптимистік жоба. «Өркендеген Қазақстан – бұл, ең алдымен мемлекеті өзін қорғап, қолдайтынын, қамқорлық жасайтынын сезінетін, тиісінше елін жан-жүрегімен сүйетін, патриоттық танытатын өздеріне сенімді адамдардың мекені деп санаймын» деді Нұрсұлтан Назарбаев.
Облыстың барлық деңгейдегі депутаттары да өз қызметтерінде Елбасы бастамаларын баянды етуге бар күш-жігерін салып, мемлекет тарапынан жасалғалы жатқан осы қамқорлықтарды халыққа кеңінен насихаттауда белсенділік танытады деген сенімдемін. Осындай ауқымды әлеуметтік жобаларды еліміздің тыныштығы мен бірлігі тұрақты болған жағдайда ғана іске асыруға болады.
Өмірзақ ЗИНУЛЛИН,
Атырау облыстық мәслихатының хатшысы
