QS Агенттігінің 2018 жылы жүргізген дербес бағалау нәтижелері бойынша ҚазҰУ «QS Stars Development Road map» халықаралық рейтингісінің «Төрт жұлдыз» артықшылық белгісін Қазақстанда бірінші болып иеленген Орталық Азия аймағындағы жалғыз университет болды.
0-ден 5 жұлдызға дейінгі QS рейтингісі жоғары оқу орындарының кең ауқымды қызметін белгілейтін және университеттердің жоғары халықаралық стандарттарға сәйкестігін анықтайтын 50-ден астам көрсеткіштерді кешенді талдау нәтижесінде анықталады.
ҚазҰУ-ге QS «Төрт жұлдыз» артықшылық белгісінің тағайындалуы университеттің жоғары халықаралық беделі мен жаһандық ғылыми және білім беру кеңістігінде көшбасшылық орынға ие екендігінің дәлелі. Артықшылық жұлдыздары университеттің мықты тұстарын көрсетеді және серіктестер мен оқуға түсемін деушілерге жоғары оқу орнын таңдауға жәрдемдеседі.
Осылайша, ҚазҰУ бірқатар көрсеткіштері бойынша «5 жұлдыз» иеленді, атап айтқанда, білім беру қызметтерін көрсету, интернационализациялану деңгейі, инфрақұрылым және инклюзивті білім беру жүйесін дамыту.
ТМД елдерінде QS-тың төрт жұлдызы тек бес университетке берілгендігін атап өту қажет, олар – әл-Фараби атындағы ҚазҰУ және Ресейдің төрт университеті.
Арман ОКТЯБРЬ,
«Егемен Қазақстан»
АЛМАТЫ
