Сенаторлардың сұрақтарына жауап берген Цукерберг, Cambridge Analytica компаниясы жинаған Facebook әлеуметтік желісінің 50 миллион пайдаланушысы туралы деректердің Ресейде сақтаулы екені туралы білмейтінін айтты. Осы жағдайды анықтау үшін компания жыл соңына дейін 20 мыңнан астам адамды жұмысқа алып, желі қолданушыларының ақпараттық қауіпсіздігі үшін жұмыс жасайтынын айтты.
Естеріңізге сала кетейік, британдық Cambridge Analytica компаниясы Facebook қолданушылары туралы деректерді көптеген елдерде саяси жарнамаларда пайдалану үшін жинаған. Соңғы деректерге сәйкес, компания әлеуметтік желілердің 87 миллион пайдаланушысы туралы ақпаратқа қол жеткізген. Цукерберг желі қолданушыларының алдындағы кінәсін мойындап, кешірім ретінде Британия газеттеріндегі жарнаманы сатып алған болатын. Сондай-ақ, Facebook-тің желіні пайдаланушылардың жеке хабарламаларын сақтайтыны туралы белгілі болған.
Сенаторлардың бес сағат бойғы сауалнама барысында Цукерберг Facebook-тегі бірқатар мәселелерге байланысты бірнеше рет кешірім сұрады. Соның бірі, желідегі ақпараттық қауіпсіздікке байланысты болды. Мысалы, АҚШ-тың сайлауына ықпал ету үшін ресейлік агенттердің Facebook-тегі ақпараттарды пайдалануы.
Цукерберг Facebook-те қандай функцияларды қосу аса қажет деген сұраққа «Мен бұл пікірталасты әртүрлі санаттар бойынша талқылауға болатындай етіп, менің командаммен бірге талқылауға шақырамын» деді.
Мәдина ЖӘЛЕЛҚЫЗЫ,
«Егемен Қазақстан»
