Жиынды кіріспе сөзбен ашқан ұйымдастырушы ұстаз Айжан Жанбылова Елбасы «Болашаққа бағдар: рухани жаңғыру» бағдарламасында қоғамдық сана жаңғырудың негізгі қағидаларын қалыптастыруды ғана емес, сонымен бірге заман сынағына лайықты төтеп берудің нақты жобаларын жүзеге асыру талабын қойғанын айта келіп, бұл орайда таяу жылдарда атқарылатын іргелі міндеттер ішінде «Жаңа гуманитарлық білім. Қазақ тіліндегі 100 жаңа оқулық» жобасы зор маңызға ие екенін атап өтті. Колледжде оқитын бір мыңнан астам студент 14 мамандыққа даярланады. Білім және тәрбие мәселелерімен 112 оқытушы айналысады. Мемлекет басшысы ұсынған жоба бойынша бәріміздің алғы мақсатымыз әлемдік бәсекеге қабілеттілік өрістеген жаһандану жағдайында халықаралық талаптарға сай сапалы білім берумен қатар, ұлттық-рухани тамырдан қол үзбеудің озық үлгілерін қалыптастыру, тәжірибелерін үйрену болмақ, деді ол өз сөзінде.
Кітапхана меңгерушісі Валентина Букатина қазақ тіліндегі 100 жаңа оқулық жобасының таныстырылымы барысында Елбасының сөйлеген сөзіне арнайы тоқталды. Қазақ тілі – бай тіл. Оны дамытудың, байытудың жолдары сан алуан. Жоба аясында атқарылып жатқан жұмыс нәтижелері қуантарлық. Қазақ тілінің кеңінен қолданылуына Үкімет тарапынан барлық жағдай туғызылған. 18 кітап пен оқу әдістемелерінің жарық көруі – үлкен істің басы. Ғылыми білімнің кең ауқымы, оның ішінде әлеуметтану, философия, дінтану, экономика, тағы басқа салалар қамтылған.
«Рухани жаңғыру» бағдарламасының басты жобасын талқылауға қатысқан мұғалімдер Баян Карманова, Оксана Копытова, студент Элвира Велгавдинова жергілікті тәжірибелермен бөлісті. Колледж еліміздегі базалық оқу орны саналады. 2011 жылдан бері қазақ-норвег жобасына қатысып келеді. «Нәтижелі жұмыс және жаппай кәсіпкерлікті дамыту» бағдарламасы бойынша аспаз, тамақ ісі, бухгалтер, слесарь-сантехник, электрмен дәнекерлеуші мамандары әзірленеді. Мұнда 50 оқу кабинеті, 10 компьютер сыныбы, 270 орынды жатақхана, 3 арнайы зертхана, 11 оқу-өндірістік шеберхана жұмыс істейді. Роман Шишкин, Ерубай Еркебұлан, Жанболат Іңкәр, тағы басқа студенттер халықаралық, республикалық байқаулардың жеңімпазы атанған. Сөйлеушілер «Серпін-2050» бағдарламасы шеңберінде оңтүстік өңірлерден келген жастардың оқитынын, білімді мемлекеттік тілде алатындарын жеткізді. «Құрылыс және үйлер мен құрылыстарды қолданысқа беру», «Технология және тамақтандыру кәсіпорындарында өндірісті ұйымдастыру» бөлімдерінде де оқу қазақ тілінде жүргізіледі.
Алдағы уақытта да гуманитарлық білімнің барлық бағыттары бойынша ең жақсы оқулықтар қазақ тілінде жарық көретініне сенімдіміз. Мұның өзі жас буынның әлемнің ең таңдаулы туындылармен кеңінен танысуына мүмкіндік береді. Жаһандық бәсекеге неғұрлым бейімделген мамандар даярлауға да ықпал етеді. Бұған дейін құнды еңбектерді орыс тілі арқылы біліп келсек, енді тікелей танысуға айқара жол ашылып отыр. 100 оқулықтың қазақ тілінде шығуы білім деңгейін жаңа сапалық деңгейге көтеретіні күмәнсіз, десті дөңгелек үстелге қатысушылар.
Өмір ЕСҚАЛИ,
«Егемен Қазақстан»
Солтүстік Қазақстан облысы
