Ел газетіне құрметіміз ерекше

Миллиондаған ұр­пақ­тың тәрбиелі де тәлімді болып өсуіне, рухани бай болып қалыптасуына ерекше үле­сін қосып келе жат­қан ел газеті – «Егемен Қазақстан» басы­лы­мы­на құрметіміз ерекше. Үлкен-кіші әр нөмірін асыға күтіп отырады. Бұл тұр­ғыдан келгенде, біздің Оңтүс­тік Қазақстан мемлекеттік университетінің ұжымы да бас басылымға қашанда тілектес. Тәуелсіздігіміздің 20 жыл­ды­ғы қарсаңында Елбасы Нұр­сұл­тан Назарбаевтың қолдауы­мен қайта ашылған 75 жылдық тарихы бар іргелі білім ор­да­сы­ның оқытушы профессор­ла­ры мен студенттері «Егемен Қа­зақстан»   газетінің ал­дағы 2012 жылдың бірінші жартыжылдығына жа­зылу жұмысына бір кісідей атсалысуда. Қа­зір­дің өзінде 150 данасына жа­зылғанымыз жөнінде газет президенті Сауы­т­бек Абдрахмановтың аты­на жол­даған жедел хаты­мызда жеткізген болатынбыз. Біз үшін ең қымбаттымыз да, киеліміз де Тәуелсіздік. Тәуел­сіздіктің бітім болмысы Елбасы арқылы көз алдымызға елестейді. Мемлекет басшысының тікелей қамқорлығымен қайта шаңырақ көтерген институтта 23 маман­дық бойынша кадр дайындалады. 65 пайыз оқытушыларымыздың ғылыми атағы бар. Олар жаңа заман үрдісіне сәйкес ғылымның, білімнің зор жетістіктерімен қаруланған. Соның нәтиже­сінде ұлттық рухы мықты әрі психологиялық ерекшеліктерімізді ісімен дәлелдеп, кәсіби маман дайындауға өлшеусіз үлестерін қосуда. Кадр мықты болмаған жерде білім мен білік үйлеспейді. Біздің ұжым осы жағына жете мән беріп, бола­шақ кәсіби мамандарды дайын­дау ісіне ерекше ден қойып отыр. Оңтүстік Қазақстан мемлекеттік педагогикалық институ­тында Елбасы саясатының жар­­шысы, халқымыздың жан­ашыры, ұлтымыздың ұйытқысы саналатын басылымға жазылу жұмысы алдағы уақытта да жалғаса беретініне сенім мол. Оңалбай АЯШЕВ, Оңтүстік Қазақстан мемлекеттік педагогикалық университетінің ректоры, профессор.