Орталықтың неонатолог дәрігері Лондондағы әлемдегі бес озық балалар клиникасының бірінде тәжірибе жинақтады. Биыл мұндағы дәрігерлер қатары аса зәру 10 маманмен – акушер-гинекологтармен, педиатр-неонатологтармен толықпақ. Сонымен қатар орталыққа шетелден заманауи медициналық құрал-жабдықтар сатып алынуда. Жақында нейрохирургтерге қажетті нейронавигаторлар мен сал ауруына шалдыққан балаларға арналған роботтық жаттығу құралдары сатып алынбақ. Ана мен бала орталығының директоры Ермек Омарбековтің айтуынша, орталық мамандарының шет мемлекеттерде білімін жетілдіруіне, соңғы үлгідегі жабдықтармен қамтылуына өңірдегі ірі кәсіпорын – «Қазцинк» компаниясы көмек қолын созып отыр. «Кәсіпорынның қаржылай қолдауы нәтижесінде орталық аналар мен сәбилердің денсаулығын сақтап, жақсартуға септігін тигізген заманауи құрал-жабдық, техникалармен жабдықталды. 2018 жылы оқу орнын бітіріп, «Ана мен бала орталығына жұмысқа тұрған жас дәрігерлердің бәрінің көтерме ақшасын төлеуге де компания қаражат бөлуді жоспарлап отыр», дейді орталық директоры.
Ана мен бала денсаулығына бейжай қарамай, қолдан келген көмегін көрсетіп жатқан «Қазцинк» ЖШС-нің әкімшілік мәселелер жөніндегі атқарушы директоры Андрей Лазарев кәсіпорын қаржысына сатып алынған құрал-жабдықтар орталықтың бөлімшелерінде жұмыс істеп тұрғанын айтады. «Мемлекет-жекеменшік әріптестігі негізінде компания қолдауына сүйене отырып, орталық дәрігерлері диагностикалық талдаулар жасаудың, отаның жаңа түрлерін меңгеріп жатыр. Бүгінде орталықта лапароскопиялық хирургия тәсілдері қолданылуда. Ана мен бала денсаулығын жақсарту үшін қандай қамқорлық жасалса да артықтық етпейді. Бұл біздің әлеуметтік жұмысымыздың басым бағыттарының бірі», дейді ол.
Азамат ҚАСЫМ,
«Егемен Қазақстан»
ӨСКЕМЕН
