Жиырма жылдық мерейтой аясында өтетін ауқымды іс-шаралар үшін республикалық бюджеттен жұмсалатын қаражат көлемі де белгілі – бас-аяғы 19 миллиард теңгеге жуықтайды. Мемлекет басшысы Н.Назарбаев сәуір айының басында бас қаланы одан әрі дамытуға арналған мәжілісте:
– Бұрынғы Ақмола қаласының төңірегі қандай болғаны бəрімізге белгілі. Жаңа қаланың орны мидай дала еді. Қазір қаланың осылай дамығанына өзім де таңғаламын. Біз ата-бабамыздың арманын орындап, Сарыарқаның төрінде ел ордасы – Астананы салдық. Дүние жүзі тамсанып, таңғалатын шаһарға айналдырдық. Елордамыздың 20 жылдық мерекесін барлығымыз бірлесіп атап өтуіміз қажет. Бұл – елдің қуанышы, – деген болатын.
Бас қаланың торқалы тойына еліміздің облыстары тарту жасап, елорданың сәулетінде қолтаңбасын қалдыруға ниет білдіріп жатқанын айта кетейік. Осыған байланысты Президент облыстар қала тұрмысына қажетті нысандар салуға көбірек көңіл бөлуі қажеттігін айтты. Осы арқылы Елбасы жоғарыда сөз еткен қаржыны ел игілігіне жаратуды меңзегені түсінікті.
– Мерекені бәріміз жақсы көреміз. Мен барлық облыстардың шараға атсалысқысы келетінін білемін. Оның бәрі бір арнамен, барынша тиімді жолмен ұйымдастырылуы керек. Облыстарға тым салмақ салудың қажеті жоқ шығар, дегенмен елордаға тарту жасағысы келгендер болса орнымен жасалуы керек. Жай ескерткіш емес, қалаға пайдалы көше, сквер, саябақ, қандай да бір нысандар салынғаны дұрыс. Жұмыстың ең маңызды тұсы – көрінбейтін жағы. Мәселен, сумен қамту, жылумен қамту, қоқысты тазалау сияқты жұмыстар. Ол бір қарағанда байқалмайды, көрсетіп мақтана алмайсың,– деген болатын.
19 миллиард аз ақша емес екені рас. Әлеуметтік желілерде ол қаржыны қайда, қандай жолмен жаратуға болатынын айтып жатқандардың да қарасы аз емес. Мәдениет және спорт министрі Арыстанбек Мұхамедиұлының, Астана әкімі Әсет Исекешевтің сөздеріне сүйенсек, төр қаланың туған күніне орайлас шаралар бас-аяғы бірнеше күнмен немесе бірер аптамен шектеліп қалмайды. Қала халқы үшін, шаһарға алыс-жақын аймақтардан келген меймандар үшін ұйымдастырылатын шаралардың ауқымы әлдеқайда кең, тіпті бірнеше айға дейін ұласатын болады. Жоспарланған шаралардың өтетін жері де Астанамен шектеліп қалмайды, Алматыда және басқа да ірі қалаларда атап өтіледі. Демек, көлемді қаржы ауқымды шараларға жұмсалады деп пайымдауға болатын сыңайлы.
Мәдениет және спорт министрлігі, Астана қалалық әкімдігі және басқа да мемлекеттік органдар мұрындық болатын іс-шараларды қоса алғанда барлығы 645 шара өткізілуге тиіс. Бұлардың қатарында ресейлік Мария театрының гастрольдік сапары, халықаралық Канн кинофестивалі-2018 аясындағы қазақ киносының апталығын өткізу, Нью-Йоркте Ә.Қастеев атындағы мемлекеттік музей қорындағы картиналардың көрмесін өткізу сынды шаралар бар.
Мәдениет және спорт министрі Арыстанбек Мұхамедиұлы айтып өткендей, 15-16 маусымда өтетін Voice of Astana эстрада әндерінің халықаралық фестивалі де көлемді қаражатты қажет ететін жобалардың санатында. Аталған эстрадалық әндер фестиваліне әлемдік супержұлдыздар шақырылмағанымен, жарық пен дыбыстың сапалы болуының өзі арзанға түспейді екен. Бір атап өтерлігі, музыкалық бағыттағы шаралардың барлығында отандық музыка өнерін, төл композиторларымыз бен жұлдыздарымыздың шығармашылығын насихаттауға баса көңіл бөлінеді.
– Біз биыл фестивальдің алғашқы күнін «А-студио» тобының жетекшісі Байғали Серкебаевтың 60 жылдығына арнағымыз келіп отыр. Екінші күнін Батырхан Шүкеновті еске алуға арнаймыз. Валерий Меладзеден бастап, Леонид Агутин, Кристина Орбакайте сынды танымал өнер жұлдыздарының барлығы Батырханның достары ретінде осы концертке қатысуды парыз санайды,– дейді А.Мұхамедиұлы.
Мерейтой бағдарламасына көз жүгіртер болсақ, 1 шілдедегі «Қазақстан барысы» республикалық қазақша күрес турнирі, 1-5 шілде аралығында өтетін XIV халықаралық «Еуразия» фестивалі, 7-13 шілдедегі І халықаралық Wide World театрлар фестивалі, 25-29 маусым күндері өтетін The Spirit of the Dance этностық музыка мен халық биі фестивалі, Халықаралық ақындар айтысы сынды ауқымды мәдени шаралар легі толастамайды екен. Wide World театрлар фестивалі аясында халықаралық симфониялық оркестр сүйемелдейтін Карл Дженкинстің Chune Astana одасының салтанатты премьерасы, «Опералия» фестивалінің бағдарламасында Мұқан Төлебаевтың «Біржан-Сара» операсы қойылатынын атап өткен ләзім.
Жыл сайын маусым айының орта шенінен бастап қала күнін тойлау қыза түсетіні белгілі. Биыл мерекелік шаралардың легі, шаһардағы мерекелік көңіл күй бірер аптаның аясында саябырлап қалмай, жаз бойы толастамауы тиіс. Бұл елордалықтар үшін де, Астанаға жазда қыдырып келетін меймандар үшін де ыңғайлы болары сөзсіз.
Қарап отырсақ, Астананың 20 жылдық торқалы тойын халықтың көңілінен шығатындай жоғары деңгейде, сән-салтанатын жарастырып өткізу жоспарланған. Оған жұмсалатын қаржы да алдын ала ойластырылып, тиімді жұмсау жағы қарастырылған. Ендігі мәселе осы қаржыны елдің мәдени, әлеуметтік, тұрмыстық игілігі үшін тиімді жұмсауға тірелетіні түсінікті. Жоғарыда Елбасының сөзінен келтіргеніміздей, елордамыздың 20 жылдық мерекесін барша халық бірлесіп атап өтуі керек. Себебі бұл – елорданың немесе елордалықтардың ғана емес, тұтас елдің қуанышы.
Арнұр АСҚАР,
«Егемен Қазақстан»
