Жастардың әлемнің гуманитарлық оқулықтарын қазақ тілінде оқуына мол мүмкіндік ашып отырған еңбектерді өңірлердегі оқу орындарының студенттеріне таныстыру мақсатында ел көлемінде ұйымдастырылған «National bookdating» акциясы аясында Тараз қаласындағы «Тараз Парасат» колледжінде Жамбыл облысы әкімі аппаратының «Қоғамдық келісім» мекемесінің ұйымдастыруымен арнайы іс-шара өтті. Оған өңірдегі жоғары және арнаулы орта оқу орындарының оқытушылары мен студенттері қатысып, оқулықтарды облыстық Қазақстан халқы Ассамблеясы жанындағы ғылыми-зерттеу тобы төрағасының орынбасары Парида Мамедова таныстырды.
Өз сөзінде Парида Мамедова Елбасы тапсырмасы негізінде 100 оқулық тізімін жасақтау кезінде 800-ге тарта кітап сарапталып, талданғанын, солардың ішінен таңдалып алынған 100 туындының аудармаға жіберілгенін айтып өтті. Осынау үлкен еңбектің нәтижесінде Дерек Джонстонның «Философияның қысқаша тарихы: Сократтан Дерридаға дейін», Энтони Джон мен Патрик Кеннидің «Батыс философиясының жаңа тарихы, Антика философиясы» 4 томдық кітабының 1-томы және «Батыс философиясының жаңа тарихы, Орта ғасыр» 4 томдық кітабының 2-томы, Реми Хесстің «Философияның таңдаулы 25 кітабы», Дэвид Бринкерховтың «Әлеуметтану негіздері», Джорди Ритцердің «Әлеуметтану теориясы», Элиот Аронсонның «Көпке ұмтылған жалғыз: әлеуметтік психологияға кіріспе», Дуэйн П.Шульц пен Сидней Еллен Шульцтің «Қазіргі психология тарихы», Дэвид Майерстің «Әлеуметтік психология», Грегори Мэнькю мен Марк П.Тейлордың «Экономикс», Дональд Ф.Куратконың «Кәсіпкерлік: теория, процесс, практика», Рикки В.Гриффинидің «Менеджмент», Карен Армстронгтің «Иудаизм, христиандық пен исламдағы 4000 жылдық ізденіс: Құдайтану баяны», Виктория Фромкин, Роберт Родман және Нина Хаймстің «Тіл біліміне кіріспе», Светлана Тер-Минасованың «Тіл және мәдениетаралық коммуникация», Алан Барнардтың «Антропология тарихы мен теориясы», Клаус Швабтың «Төртінші индустриялық революция» атты оқулықтары жарық көрген.
Кітаптарды таныстыру кезінде П.Мамедова елімізде бір уақытта өтіп отырған «National bookdating» акциясының негізгі мақсаты – жастарға мемлекет тарапынан көрсетіліп отырған қамқорлықты көрсету екендігін айтып өтті. Сонымен қатар бүгінгі таңда қазақ тіліне аударылған тарих, саясаттану, әлеуметтану, психология, дінтану, философия және журналистика салаларындағы кітаптардың әрқайсысы 10 мың данамен басылып, алдағы бір ай ішінде жоғары оқу орындары мен кітапханаларға таратылады. Сондай-ақ аталған құнды дүниелер ағымдағы жылдан бастап оқу бағдарламаларына да енгізіліп, барлық оқулықтардың электронды нұсқалары және соның негізінде әзірленген бейнедәрістер топтамасы 100kitap.kz сайты арқылы да таралатын болады. Кітаптарды таныстыру кезінде П.Мамедова студенттерге қолда бар мүмкіндікті пайдаланып, аталған кітаптарды түгелдей оқып шығуға кеңес берді. Ал жиын барысында студенттер қазақ тіліне аударылған және аударылып жатқан кітаптарға қатысты мәліметтер жайында сұрап, тиісті жауап алды.
Сондай-ақ Тараз қаласындағы «Достық» үйінде Елбасының «Болашаққа бағдар: рухани жаңғыру» бағдарламалық мақаласы аясында «Жаңа гуманитарлық білім. Қазақ тіліндегі 100 жаңа оқулық» жобасын талқылау мақсатында Қазақстан халқы Ассамблеясының бірыңғай күніне орай жиын өтті. Оған өңірдегі «Жаңғыру жолы» жастар қозғалысының, «Ақ желкен» жастар лигасының өкілдері, Тараз инновациялық-гуманитарлық университетінің және «Болашақ» колледжінің студенттері, Жамбыл облыстық жастар саясаты мәселелері басқармасына қарасты «Жастар ресурстық орталығы» мекемесінің қызметкерлері қатысты.
Жиынға қатысқан жастар арасында гуманитарлық ғылымдар шеңберінде қазақ тіліне аударылған кітаптардың алғашқы топтамалары насихатталды. Өз сөзінде Жамбыл облысы әкімі аппараты «Қоғамдық келісім» мекемесі көрме залының меңгерушісі Вера Майкович «Қазақ тіліндегі 100 жаңа оқулық» жобасы бойынша аударылған кітаптардың бүгінгі жастар үшін аса маңыздылығын айтып өтті. Сондай-ақ алдағы уақыттарда жастардың аталған кітаптар арқылы әлемдік деңгейдегі гуманитарлық бағыттағы ғылымдарды терең игеруге мүмкіндік алатыны да айтылды. Шара барысында жастар 200 аудармашы мен 40 редактор бірлесе еңбек еткен кітаптар туралы сұрап, нақты жауаптар алды. Сонымен қатар жаңа жинақтар туралы арнайы бейнеролик көрсетіліп, жиналған жастар «Достық» үйінің сәулетімен танысты.
Хамит ЕСАМАН,
«Егемен Қазақстан»
Жамбыл облысы
