![Асқар Мамин Алматыда туризмді дамыту мәселелері бойынша жиналыс өткізді](/media/2022/03/29/crop-61_13_826x1101_105542343700.jpg)
«Мемлекет басшысы Нұрсұлтан Назарбаев Қазақстанда туризмді дамытуға ерекше назар аударып келеді. Өзінің жыл сайынғы Жолдауында Елбасы ішкі және сырттан келушілер үшін туризмді дамыту өңірлерде жұмыс орындарын ашу мен экономикалық дамудың іргетасын қалаудың негізгі көздерінің бірі болып табылады деген болатын», деп атап өтті А.Мамин.
Алматы және Алматы облысы туризмді дамытудың негізгі қозғалтқыштары болып табылады. Бұл аймақ арқылы еліміздің негізгі көлік бағыттары өтеді, ал өңірдің географиялық, тарихи және табиғи ерекшеліктері туризмді дамытудың берік іргетасы бола алады.
Жиналыста сөз сөйлеген Алматы қаласының әкімі Б.Байбек Елбасының тапсырмасына сәйкес, Алматыда туризмді экономиканың жаңа қозғаушы күші ретінде дамыту үшін жүйелі жұмыс жүргізіліп жатқандығын жеткізді. Қалада бәсекеге қабілетті туристік өнімді құру, тұрғындар мен қала қонақтарына ыңғайлы және қауіпсіз ортаны қалыптастыру мақсатында «Туризмді дамытудың 100 қадамы» қалалық жоспары әзірленді.
Алматы қаласы экономикасының 87% -ы қызмет көрсету сервистері болып келеді және Қазақстанға келген әрбір екінші шетелдік турист оңтүстік астанаға соқпай кетпейді.
Мәдениет және спорт министрі А.Мұхамедиұлының айтуынша, 2018 жылдың соңына қарай Қытай мен Үндістан азаматтары үшін Алматы мен Астана қалалары арқылы өтетін 72 сағаттық визасыз транзит іске қосылады. Сондай-ақ Алматы облысында ірі инвестициялық жобалар: Медеу, Шымбұлақ, Ақбұлақ, Табаған демалыс аймақтарында тау кластерін дамыту, тақырыптық саябақтарды, оның ішінде «Қорғас» ХШМЫО-да салу, Үлкен Алматы каналы бойында туристік және спорттық аймақ салу құрылысы жүзеге асырылады.
Алматы облысы әкімінің орынбасары А. Байжановтың айтуынша, мемлекеттік тапсырыспен өңірде жолды күрделі жөндеуден өткізу сәтті жүзеге асырылуда. Биыл Үшарал – Достық бағдарындағы жолға күрделі жөндеу басталды. Ол арқылы туристер Алакөлге жайлы жолмен жете алады. Балқаш көліне апаратын 140 шақырым жол жөнделді. Көлсай көлдеріне жеткізетін жолдар толықтай жаңғыртылған.
Кеңес барысында А.Мамин Алматы мен Алматы облысы аумағында туризмнің жол картасын жасаудың бірлескен кешенді шараларын жүзеге асыру сапалы жүргізілуге тиіс екендігін баса айтты. Алматы қаласының, Алматы облысының әкімдігіне, сондай-ақ басқа мүдделі мемлекеттік органдар мен ведомстволарға бірқатар нақты тапсырмалар берді.
Өңірге сапары аясында бірінші вице-премьер оңтүстік астана әуежайын, Алматы-1 және Алматы-2 темір жол стансаларын дамыту жоспарларымен танысып, Visit Almaty туристік ақпараттық орталығын аралады. Сондай-ақ «Қорғас-Шығыс қақпасы» АЭА-ға барды.
«Қорғас-Шығыс қақпасы» АЭА БК» АҚ бас директоры М. Баймұхамбетовтің айтуынша, жалпы құны 485 млрд теңгені құрайтын 14 жоба 2020 жылға дейін жүзеге асырылмақ.