Халқымыздың қандықол қарақшыларға айтары, осы
Алматы түбіндегі Боралдай кентінде болған соңғы оқиға лаңкестікпен қатты емес, қатал күресу қажет екендігін айғақтап берді. Осы орайда, елдің тыныштығын бұзған сүмелектерге еш аяушылық жасалмауы тиістігін де атап көрсеткен жөн. Мұндай ұстаным оқырмандар пікірлерінен де анық аңғарылады. Төменде сондай пікірлердің бірнешеуі жарияланып отыр. Мұны бүкіл қазақстандықтардың көзқарасы деп қабылдау керектігі ақиқат. ____________________________________БҮЛІК ШЫҒАРУ АДАМ ӨЛТІРУДЕН ДЕ АУЫР КҮНӘ
Алматы облысы, Іле ауданы, Боралдай елді мекенінде лаңкестік әрекеттер орын алғаны елдің мұсылман қауымын дүр сілкіндірді. Соның салдарынан 8 қараша күні екі полиция қызметкерінің қаза тапқаны, осы қылмыстық әрі қаныпезерлік істі іздестіруге және анықтауға бағытталған арнайы операция барысында Ұлттық қауіпсіздік комитеті «Арыстан» бөлімшесінің екі қызметкері жараланып, кейіннен осы ауыр жарақаттың салдарынан көз жұмғанын ҚР Бас прокуратурасының хабары арқылы теледидардан естіп, біліп отырмыз. Егемендік алған кезге дейін халқымыз діни құндылықтарға шөліркеп келгені белгілі. Өйткені, коммунистік саясат, діни атеизм мұсылман қауымының қасиетті ислам дінін еркін ұстануына кедергі келтірді. Тек тәуелсіздікке қолымыз жеткеннен кейін ғана ислам дінін ұстанушылардың легі молайып, мешітке келушілер мен намазға жығылушылар саны арта түсті. Әрине, бұл қуанышты жәйт болғанымен, бәз-біреулер үй ішінен үй тігіп, діни экстремистік әрекеттерге барып, ынтымағы мен бірлігі жарасқан мұсылмандардың арасына іріткі салуы ауыр күнә болып табылады. Бұған мысал ретінде Боралдайда орын алған лаңкестік топ мүшелерін де келтіруге болады. Бұл қаныпезерлер қасиетті Құран мен хадистерге қарсы жексұрын іс-әрекеттерге барып отыр деп есептейміз. Сондықтан да олардың лаңкестік мақсаттағы бұзық ой-пиғылдарын қатаң айыптаймыз. Қазақстандық қоғам мен қазақ елінің тыныштығын бұзуға әрекет жасаған бүлікшілердің зұлымдық іс-әрекеттері ислам дінімен үш қайнаса сорпасы қосылмайды. Өйткені Алла Тағала Құран-кәрімде мұсылмандарға бүлік шығаруға қатаң түрде тыйым салғаны белгілі. Әрине, қасиетті Құранда лаңкес немесе лаңкестік деген сөз жоқ. Оның есесіне бүлік шығару деген тіркес бар. Бұл екеуі бір-бірімен төркіндес, мағыналас ұғымдар болып табылады. Айталық, Құран-кәрімнің Бақара сүресінде: «Бүлік шығару адам өлтіруден де ауыр күнә» деп көрсетілген. Ал Мәйда сүресінде «Алла Тағала бүлік шығарушыларды сүймейді» деп жазылған. Сондықтан да Алла Тағаланың жер бетіне бейбітшілік пен тыныштықты орнату үшін түсірген соңғы діні ислам, бүлікшілерді терең айыптайды. Біздің қоғамда лаңкестік пен бүлік шығарушыларға орын жоқ. Оның алдын алу үшін ауызбіршілік таныта білейік, ағайын. Бауыржан ӘЛИҰЛЫ, Қазақстан мұсылмандары діни басқармасының Батыс Қазақстан облысы бойынша өкіл имамы. Орал.* * *
БАЛАЛАРЫМЫЗДЫ ҚАСКҮНЕМДЕРДІҢ ҚОЛЫНАН ҚАЗА ТАБУЫ ҮШІН ӨСІРІП ОТЫРМЫЗ БА?
Өткен апта соңында телеарналардан «Алматы облысындағы Боралдай кентінде лаңкестік ұйымның бес мүшесінің көзі жойылып, арнайы операция барысында Ұлттық қауіпсіздік комитеті «Арыстан» қызметі арнайы бөлімшесінің екі қызметкері қаза тапты» деген суыт хабарды естіп, жағамызды ұстадық. Оның алдында ғана Тараздағы оқиға елді дүрліктіріп, пиғылы жаман қараниет жігіт қаншама адамның қанын мойнына жүктеген еді. Қарап отырсақ, бұл қанды жағдай бір емес, екі емес өрістеп бара жатуы – әсіресе, көп балалы аналардың тынышын алуда. Сонда біз балаларымызды қаскүнемдердің құрбаны болуы үшін туып, өсіріп, тәрбиелеп отырмыз ба? Естіп-білуімізше сол лаңкестік әрекеттерді ұйымдастырып, өзін өзі жарып жіберіп жатқандардың барлығы дінді жамыла отырып, діннен безгендер. Себебі, әртүрлі қасаң ұғымға саналарын сансыратқан кейбір жастар қасиетті ислам дінінің өзін жік-жікке бөліп, жіліктеу пиғылын ұстанып отырғаны жасырын емес. Мен өзі Ресейде туып-өскен қазақпын. Сөйтсек те, бізге ислам дінін іштей мойындап, санамызда сақтап, «бисмиләмізді» аузымыздан тастамауға үйреткен еді. Мәселен, ата-анам коммунистер болса да, Жаратқанға деген сенімі күшті болды. Содан да болар, үш жасымыздан тілімізді кәлимаға келтіріп, бір Алла Тағаланың барына сендіріп өсірді. Кеңес Одағының түкірігі жерге түспей тұрғанның өзінде өлікті қазақша жөнелтіп, ораза ұстап, айт мерекесін тойлайтынбыз. Бірақ, ол кезде бет-аузын сақал басқандар, орамал салып, тұмшаланған әйелдер жоқ болатын. Қазір ше? Ел – аман, жұрт тынышта, бейбіт өмірде адам өлімі көбейіп кетті. Аналар балаларын әскерге, үлкен қалаларға жұмысқа жіберуден қорқады. Ал соңғы бір-екі айдың көлемінде қазақтың жігіттері өздерінің жап-жас өмірлерін қиып, сорақы қылмысқа баруы ақылға симайтын, адамға да, Аллаға да жат қылық. Әрине, олардың ата-анасы «осындай қаскүнем әрекетке бар, біреудің баласын өлтір» деп тәрбиелемеген шығар. Болмаса Тараздағы өзін өзі жарып жіберген жігіттің шешесі баласының кінәсін мойындап, қайтыс болған арыстай азаматтардың ата-анасынан, отбасыларынан кешірім сұрар ма еді? Тіпті, есікті ашпай, елдің бетіне қараудан ұялды емес пе. Міне, бұл еліміздің тыныштығын, берекесін көре алмайтын бұзық ойлы, ниеті, пиғылы жаман адамдардың, шетелдегі лаңкестік ұйымдардың жастарымызды улап, осындай әрекетке баруына дінді пайдаланып, қару етіп отырғандығында. Күлбанра ДАУЫТОВА, Алматы қалалық көп балалы отбасылар одағының төрайымы. Алматы.
