Ғасырлар бойы қалыптасқан жауынгерлік рух, өршіл мақсат тәуелсіздік бедерінде салтанат құрды. Ал тәуелсіз ел тарихындағы 7 мамыр – Отан қорғаушылар күні қазақ ұлты үшін қашанда ерекше маңызға ие.
Әсіресе жастарға патриоттық рух беруде бәсі жоғары. Бұл күні айрықша салтанатпен өтетін республикалық әскери парадтың Қазақстан Республикасының Қарулы Күштерінің әлеуетін көрсетеді.
Биыл құрылғанына 26 жыл толып отырған Қарулы Күштеріміздің айбыны асқақтап, мерейі артуда. Жыл сайын елімізде өтіп келе жатқан әскери шеру халқымыздың жауынгерлігін, батырлығын айғақтай түсетін айрықша салтанат. Астана қаласында өткен айрықша салтанаттың лебі егемендіктің рухын, тәуелсіздіктің тарихын әрдайым танытып келеді. Осы орайда айтулы шараны биыл Жамбыл жерінде өткізу жоспарланған. Бүгінгі таңда «Мәтібұлақ» полигонында өтетін әскери парадқа дайындық деңгейі жоғары. Салтанатты шараның талапқа сай өтуіне еліміз бойынша барша әскери құрылымдар жұмылып, ел айбынын асыру мақсатында бірлесе жұмыс атқаруда. Қазақ елінің бірлігі мен ынтымағын танытатын, қайсарлығы мен ерлігін әйгілейтін шараның ел тарихындағы орыны ерекше.
Жалпы, тәуелсіз еліміздің тарихында өтіп келген әскери шерулердің өзіндік ерекшеліктері қалыптасқан. Ал Жамбыл облысының Қордай ауданында өткелі отырған әскери шеруге тартылған жеке құрам мен әскери техниканың саны жөнінен де биыл өзгеше сипат алуда. Мәселен, «Мәтібұлақ» полигонында жаяу әскер мен парадтық есептоп құрамында шамамен 3000-нан аса жауынгер салтанатты маршпен адымдап өтетін болады.
Бұдан өзге, шеруге еліміздің қорғаныс өнеркәсібінің қуатын дүйім жұртқа әйгілейтін 300 техника мен Әуе қорғаныс күштерінің 30 бірлік авиациялық ұшақтары қатысқалы отыр. Жамбыл өңірінде өтетін әскери шеру кезінде қазақстандықтар алғаш рет биылғы және өткен жылдары қорғанысымыздың арсеналын толықтырған жаңа әскери техникалар мен заманауи қару-жарақ үлгілерін де тамашалай алады.
– Биылғы жылы Қордай ауданының Гвардейск әскери гарнизонында жауынгерлік парад өткізу жоспарланып отыр. Әсіресе жастарға патриоттық тәрбие беруде бұл салтанатты шараның маңызы ерекше. Әрі шеру барысында еліміздің қорғаныс саласының мүмкіндігінің жоғары екенін де тамашалауға болады. Мәселен «Оңтүстік» өңірлік қолбасшылығына қарасты Қордай ауданындағы 40 Отар әскери базасында танк, артиллерия бригадалары жұмыс істейді. Мұнда жауынгерлік дайындық та айрықша әдіспен жоғары деңгейде өтеді. Ал биыл Отан қорғаушылар күніне жоспарланып отырған әскери шеруге қолбасшылықтан 800-ге жуық әскери азамат пен 150-ге тарта техника қатыстырылады деп жоспарлануда, – дейді «Оңтүстік» өңірлік қолбасшылығы штаб бастығының орынбасары, подполковник Аман Тәжиев.
Бүгінде «Мәтібұлақ» полигонында Отан қорғаушылар күніне орай өтетін әскери шеруге дайындық жұмыстары қызу жүргізілуде. Еліміздің қорғаныс саласының қайратын танытып, қуатын көрсететін салтанатты шараның облыс үшін ғана емес, еліміз үшін де маңызы зор.
Хамит Есаман,
«Егемен Қазақстан»
Жамбыл облысы
