Өткен аптада жартылай финалдың алғашқы матчтарында тартысты ойындар өтті. «Арсенал» өз алаңында «Атлетикомен» тең түсіп, «Марсель» «Зальцбургты» жеңді. Бұл екі ойынның алғашқысы тартымды әрі шым-шытырық оқиғаға толы болды. Лондоннның «Арсеналы» кездесу фавориті еді. Испаниялықтардың сапында қорғаушы Шимо Врсалько «қызыл қағаз» алып, алаңнан қуылған соң, «Арсеналдың» шабуылы күшейе түсті. Александр Ляказзет есеп ашып, «зеңбірекшілерді» алға шығарды. Алайда 80-минутта Ануан Гризман таразы басын теңестіріп кетті. Бұл ойында «Атлетиконың» бас бапкері Диего Симионе де төрешіден «қызыл қағаз» алып, шәкірттеріне жақын жерден ақыл айта алмай қалды. Енді ол өз алаңындағы ойында да, трибуна төрінен орын алады.
Маусым соңында бас бапкерлік қызметінен кететін Арсен Венгер 24 жыл басқарған командасымен кетераяқ жасап, бір трофей жеңіп кеткісі келеді. Бұл ойын Венгер үшін еурокубоктегі 250-ші ойын болыпты. Сонымен бірге лондондықтарға қазір Еуропа лигасының кубогы ауадай қажет. Себебі олар ішкі біріншілікте үздік төрттіктен шығып қалып, Чемпиондар лигасына қатысу мәртебесінен айырылды. Демек, «Вандо Метропалитано» стадионында өтетін ойында Арсен Венгер командасы ештеңеден тайынбайды.
Бірақ «Атлетико» Еуропа лигасының соңғы 3 ойынында, өз стадионында мүлде гол жібермей, жеңіске жетіп отырды. Ал «Арсенал» испан клубтарына қарсы өткен сырттағы ойындардың басым бөлігінде жеңіліс тапқан. Оның үстіне «Арсенал» Еуропа лигасының дебютанты болып саналады. Жауапты ойында басымдық алаң иелерінде болғанымен, «Атлетикоға» қарсы 7 рет ойнап, 4 гол соққан Месүт Өзіл секілді футболшылар текетірес тағдырын өзгертіп жіберуі мүмкін.
Ал екінші жауапты ойын Аустрияда өтеді. «Зальцбург» Францияның ортаңқол ұжымы «Марсельді» қабылдайды. Алғашқы ойында Димитри Пайе бастаған сайыпқырандар қарсыластың адымын аштырмай, 2:0 есебімен басым түсті. Енді өз алаңында 10 ойын бойы жеңіліп көрмеген «Зальцбург» француздарға не күш көрсетер екен?! Жай жеңіп қана қоймай, аустриялықтарға 3 доп айырмасы керек. Осы жылғы Еуропа лигасында олар 3 ойында 3 доп айырмасымен жеңіске жеткен. Сонымен қатар қос команда топтық деңгейде бір-біріне қарсылас атанған. «Зальцбург» өз алаңында 1:0 жеңіп, сырттағы ойынды тең аяқтаған.
Бұл кездесудің жеңімпазы 16 мамыр күні Лион қаласында өтетін финалда шартты түрде алаң иесі болып саналады.
Ермұхамед МӘУЛЕН,
«Егемен Қазақстан»
