Рейхстагқа ту тіккен қазақ, Халық Қаһарманы Рақымжан атасы 1924 жылы 19 қазанда өмірге келсе, кішкентай Қошқарбаев 2013 жылы 19 қазанда дүние есігін ашыпты. Тегі мен туған күні сәйкес келіп тұрған ұлға ата-анасы, бауырлары ырым етіп, қаһарман атаның есімін еншілетті. Әрине қарт Рақымжанның тағдыры емес тағылымы, батырлығы, азаматтығы мен қайсарлығы дарысын деген тілек, халық үшін кеудесін оқ пен отқа төсеп, ерен ерлік үлгісін көрсеткен батыр бабаға деген шексіз құрмет. Бүгінде кішкентай Рақымжан Ақтау қаласындағы «Сұлтан» атты балабақшаға барады. «Бала тілі – бал» дегендей, «Мен Нұрсұлтан бақшасына барамын!» дейді мақтанышпен. Ақылды, жігерлі, байсалды, белсенді бала балабақшада өтетін түрлі шараларда алдыңғы лекте жүреді.
– Есте сақтау қабілеті өте жоғары, алғыр. Теледидардан бір көрген нәрсені сол күйінде қайталап бергенде, өзіміз қайран қаламыз. Ең бастысы, аман болсын, елін сүйген азамат болсын, – дейді әкесі Қанат Жұмабаев. Қанат Қошқарбайұлы – жаттықтырушылар арасында самбо күресінен үш дүркін Әлем чемпионы, қазақ күресінен бірнеше дүркін түйе балуан, халықаралық дәрежедегі спорт шебері. Қазіргі таңда Ақтау қалалық әкімдігінде қалалық спорт бөлімінің басшысы болып қызмет атқарып жүр. Ол ұлының өзі секілді спортшы болғанын қалайды, алайда қай спорт түрін баланың ыңғайына, қабілетіне қарай анықтамақ.
Еркін еліміздің ертеңіне қызмет етер жеткіншектер желкілдеп жетіле бергей, дедік біз де әке тілегіне ортақтасып.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы
