Ғалымжан Мейірханұлы Кентау қаласындағы №4 Ататүрік атындағы мектеп-лицейінің түлегі. Мамандығы инженер. Бүгінде Алматы қаласындағы Әскери-шабуылдаушы десанттық бөлімінде келісімшарт бойынша жұмыс істейді.
Әскери қызметші үйге қайтып келе жатқанда көп қабатты тұрғын үйдің жоғарғы қабаты жанып жатқанын көреді. Улап-шулап жатқан жұрт. Абыр-сабыр халық. Ал Ғалымжан өрт сөндірушілерді күтпей-ақ асығыс көмекке ұмтылды. Өйткені уақыт тар. Өртенген үйде адам болса көмек қолын созу қажет деген ой бойын шымырлатты. Жас жігіттің жылдам қимылдағаны да сол. Қазір өрт сатысымен жоғарғы қабатқа көтеріліп, мансардтық шатырдан төмен түсу керек деп ойлады. Ол есіктен ішке еніп, түтін тұмшаланған бөлмелерді аралап шыққанда ес-түссіз жатқан екі балдырғанды бір-бірлеп көтерген күйі сыртқа қарай ұмтылды. Тілсіз жау қарайтын түрі көрінбейді. Асықпаса болмайды. Түпкі бөлмеде әлсіреп, үнсіз жатқан қос сәбиді тез көтеріп алады да сыртқа шығарады. Осылайша де-
санттық шабуылдау-әскерлеріне қарасты 61993 әскери бөлімінің әскери қызметшісі, ефрейтор Ғалымжан Әлеуханов өрт ішінде қалған балдырғандарға өмір сыйлады.
Арада уақыт өтті, бәрі де ұмытылған да еді. Ол бұл оқиғаны еске алуға да ыңғайсызданады.
– Менің жасағаным батырлық емес қой, – деп жымияды Ғалымжан. – Кез келген адам жасауға тиісті іс емес пе? Әскери немесе қай саладағы адам болсын маңызды емес. Бастысы, қиын жағдайда қол ұшын созу парызың деп ойлаймын. Ең алдымен 61993 әскери бөлімнің командирі подполковник Болат Дүйсембаевқа бөлімде өткізілетін сабақтары үшін шын көңілден алғысымды білдіргім келеді. Солардың арқасында барлық десантшы жауынгерлер екпінді істердің алдыңғы сапында жүргеніне қуанамын. Бұл маған кәдеге жарады деп ойлаймын.
– Біз Ғалымжанмен мақтанамыз, – дейді Кентау қалалық Жастар ресурстық орталығының директоры Қанат Бекметов. – Оның ерлігі жастарға қашанда үлгі әрі өнеге болары анық. Жастар да ержүрек Ғалымжан Мейірханұлындай болғысы келетіні біз үшін де мақтаныш. Лайым, өрендеріміз өнегелі істерімен өсе берсін. «Қазақстанның 100 жаңа есімі» жобасының жеңімпазы атануымен құттықтаймыз. Мерейің өсе берсін, өрт кезінде жанқиярлықпен ерлік жасап, өз өміріңізді тәуекелге тігіп, балдырғандардың өмірін сақтап қал-ған бейбіт күннің батыры!
балаларды өрттен құтқарған сарбаз Ғалымжан Әлеуханов жуырда Ақордада «Ерлігі үшін» медалімен марапатталды. Бұл жөнінде Елбасы «Бейбіт өмірде басын қатерге тігіп, екі баланы өрттен құтқарған Ғалымжан Әлеуханов ерен ерлік көрсетті. Оның бұл ісі барша жұртқа үлгі. Сол себепті «Ерлігі үшін» медалімен марапатталады», – деді.
Сапарбай ПАРМАНҚҰЛ,
«Егемен Қазақстан»
АЛМАТЫ
