Жаңаарқа ауданының орталығы Атасу кентінің мәдениет үйінде қоғам қайраткері, «Рухани жаңғыру» жобалық кеңсесінің Қарағанды облысы бойынша бас менеджері Бақытқали Мұсабековтің әдеби-танымдық кеші өтті. Қарағанды облысының ішкі саясат басқармасының, Азаматтық альянстың облыстық бөлімшесінің және Жаңаарқа ауданы әкімдігінің қолдауымен, «Рухани жаңғыру» бағдарламасының аясында ұйымдастырылған шара «Қазақтың би-шешендерінің мұрасы» тақырыбына арналды.
Қазақтың ауыз әдебиетін қалыптастыруға шешендік өнердің өлшеусіз үлес қосқаны сөзсіз. Өскелең ұрпақ ел тарихындағы әйгілі шешендер туралы, олардан қалған асыл мұраны білуі тиіс.
– Біздің мақсатымыз – халқымыздың аузы дуалы би-шешендерінен қалған рухани мұраны ұрпақтан ұрпаққа жеткізу. Елбасы Н.Назарбаев өзінің қоғамдық сананы жаңғырту туралы бағдарламалық мақаласында басты шарт – өз мәдениетімізді, өзіндік ұлттық кодымызды сақтап қалу екенін атап айтқан болатын. Осы мақсатта біз жер-жерде жастармен кездесулер ұйымдастырып, рухани мәселелерге арналған тақырыптарды қозғап жүрміз, – дейді «Рухани жаңғыру» жобалық кеңсесінің бас менеджері Бақытқали Мұсабеков.
Кездесу барысында ол тыңдаушыларға қазақ халқының Майқы би мен Аяз биден (ХІІ-ХІІІ ғ.ғ.) бастап, Төле, Қазыбек, Әйтеке билерге дейінгі шешендік өнер мектебінің тарихынан әңгіме шертті. Дәрістің барысында 20 би-шешен, олардың бай мұрасы туралы салиқалы әңгімелер айтылды.
Жас буын үшін тәрбиелік мәні зор кештер бұған дейін облыстың Осакаров, Нұра және Бұқар жырау аудандарында ұйымдастырылған болатын.
– Мұндай кездесулер тек жастар үшін ғана емес, барша халық үшін пайдалы. Бүгін біз көп мағлұмат алдық, көп нәрсені білдік, – дейді Жаңаарқа ауданы ардагерлер ұйымының мүшесі, зейнеткер Шаһизада Әбілдин. – «Рухани жаңғыру» секілді бағдарламалар жастарымыздың ел мен жердің тарихын ұмытпауы үшін өте қажет.
Тәрбиелік мазмұнға құрылған танымдық кештер одан әрі жалғаса береді.
Қайрат ӘБІЛДА,
«Егемен Қазақстан»
Қарағанды облысы
