Бұл өзгеріс «Бурабай» ұлттық паркінің биосферасын сақтау, туристерге барынша қолайлы ахуал жасау үшін қолға алынып отыр. Сонымен қатар, Ұлттық парк аумағында және оған іргелес орналасқан жерлерде тұратын елді-мекендердің халқына тиімді болу жағы да да ескерілгенін атап өткен жөн.
«Бурабай» МҰТП директорының орынбасары Венера Нұғманова:
«Бұрын Ұлттық парктерге келгені үшін алынатын төлемақы республикалық бюджетке түссе, Салық кодексіне өзгеріс енуіне байланысты енді ол қаражат Ұлттық парктердің есебінде болады. Бурабай – еліміздегі халық ең көп келетін Ұлттық парк. Биыл келген туристер саны 1 миллионнан асты, жыл санап бұл көрсеткіш өсіп келе жатыр. Әрине, туристер көп болған сайын жергілікті табиғатқа да үлкен салмақ түседі. Қоқыс көбейеді, топырақ эрозияға ұшырайды, тау-тастар бүлінеді. Өрт қаупі күшейеді. Жұмыс күшін көбейтуге тура келеді. Оның барлығы қосымша шығынды қажет етеді», дейді.
Қазіргі таңда «Бурабай» паркіне кіретін тұстарда автоматтандырылған 5 өткізу-бақылау бекеті жұмыс істеп тұр. Төлемді Kaspi және Halyk Bank QR-кодтары арқылы жасауға болады. Сонымен қатар төлем терминалдары орналастырылып жатыр.
- «Бурабай» ұлттық паркінің аумағында тұратын, сондай-ақ ұлттық паркпен іргелес елді-мекендердің 26,5 мың халқына өту тегін. Ешқандай төлемақы алынбайды. Яғни, жергілікті халықтың мүддесі ескерілді. Туристердің келгені жақсы, әрине. Бірақ осы жерде өмір сүріп жатқан адамдардың жағдайын ойлау керек, - дейді Венера Нұғманова.
Спикер атап өткендей, «Бурабайда» экожүйені қорғауға бағытталған арнайы табиғат қорғау режимі бар. Орманды өрттен қорғау, жаңа көшет отырғызу, аң-құстар мен балықтарды қорғау, оларға қысқы азық-түлік әзірлеу, қоршаған ортаға мониторинг жүргізу, биоқалдықтарды тазалау сияқты жұмыстар жыл бойы жүреді. 2017 жылы енгізілген тариф 7 жылдан бері алғаш рет өгертіліп отырғанын айта кеткен жөн.
