Шара аясында облыстық кітапхана оқырмандары аудан тарихына, өлкетануға арналған «Қандай көркем, туған өлкем!» атты және ұлттық тағамдар көрмесін тамашалады. Облыстық мәдениет басқармасының басшысы Ерлан Қалмақов өткен жылы басталған «Кітапхана күндері» жобасын Амангелді ауданының жалғастырғанына ризашылығын білдірді.
«Бір күн ғана өтетін шара болғанымен оның ішкі мазмұны кең. Оқырмандар осы ауданның тарихына, бүгінгі жетістіктеріне қатысты мағлұматтарға қанығады, ауылдағы мәдени орталық–кітапхананың атқарып жатқан жұмыстарымен танысамыз, осы аудан өңірінен шыққан халқымыз қайраткерлерінің, өнер жұлдыздарының, еңбек майталмандарының өмірі мен шығармашылығына қатысты тағылымды кездесулердің куәсі боламыз. Осының барлығы да жұртшылыққа рухани серпіліс береді» деді Ерлан Болатұлы.
Амангелді аудандық кітапханасы күндері шеңберінде кітапхана қызметкерлері келушілерге мәдени ошақтың соңғы жылдары дамуы, жетістіктері туралы айтып берді.
«Қазір Амангелді ауданында 23 кітапхана жұмыс істейді. Амантоғай ауылында модельдік кітапхана ашылды, орталық кітапханада цифрлдандыруға орай заманауи бюағдарламамен жұмыс істей бастадық. Алдағы уақытта «Цифрлық Қазақстан» бағдарламасына орай аудандағы тағы төрт кітапхананы электрондау жұмыстары, ол үшін цифрлық аппараттар алуға ауданда қаржы қарастырылып жатыр. Ауданда 18 мың тұрғынның 11 мыңы біздің кітапханалардың оқырмандары. Кітапхана ауылдағы ьбірден бір мәдени ошаққа айналған» деді Амангелді аудандық орталық кітапхананың директоры Көркем Мұсабаева.
Амангелді аудандық кітапханасының облыс орталығындағы күндері шеңберінде Қазақстанның халық әртісі Әнуар Боранбаевты еске алу кеші өтті.
Нәзира Жәрімбет,
«Егемен Қазақстан»
Қостанай
