QR-код ағылшын тілінде quick response деген сөз, яғни шұғыл жауап деген мағынаны береді. Сонымен қатар бұл Denso-Wave жапон фирмасы ойлап тапқан мобильді құрылғының камерасы арқылы затты жылдам тану үшін ақпарат беретін екі өлшемді штрих код болып табылады. Сондықтан да QR-кодтың көмегімен кез келген ақпаратты кодтауға және ақпаратты жылдам тануға болады.
Әрине бұл бүгінде жәдігерлерді тануда әрі сол жәдігерлер туралы ақпарат алуда таптырмас құрал. Елбасы «Болашаққа бағдар: рухани жаңғыру» бағдарламалық мақаласында ақпараттық технологиялар қарыштап дамып бара жатқан бүгінгідей заманда ІТ саласын дамытпасақ, дамыған 30 елдің қатарынан көріну қиын екенін айтқан болатын. Бүгінде әлемдегі өркениетті елдердің барлығы дерлік цифрлы жүйеге көшті. Ендігі жерде Елбасы белгілеп берген нақты бағыт нәтижесінде цифрландыру жүйесіне көшу заман талабы болып отыр.
«Музей – елдің тарихын, ұлттық санасын жаңғыртушы мекен. Ұрпақтар арасындағы сабақтастықты жалғау, сан түрлі мәдениеттердің арасын жақындату, бауырластық қарым-қатынас орнату музейлерге жүктелген міндет. Бұл ретте Жамбыл облыстық тарихи-өлкетану музейі де музей қорындағы жәдігерлерді көрсетуде алдыңғы қатарлы технологияларды қолдануды бастап кетті. Мәселен, музейде «Цифрлы Қазақстан» бағдарламасы аясында жасалып жатқан QR-код жобасы іске асуда. Бүгінде музей қорындағы 64 мыңнан астам экспонаттың 200-ден астамына цифрлы код енгізіліп қойды. Қорымыздағы қалған жәдігерлер мен ескерткіштерді кодтау кезең-кезеңімен жүзеге асатын болады. Бұл музейге келушілердің уақытын үнемдеуге, әсіресе смартфондар мен гаджеттерді көп пайдаланатын жас буын үшін тиімді әрі олардың музейге, тарихи жәдігерлерге деген қызығушылықтарын арттыратын жоба болатынына сенімдіміз», дейді музей директоры Гүлнұр Ембердиева.
Музейдегі әрбір жәдігер мен макеттердің тұсында олардың тарихы туралы толық мағлұмат жазылған QR-кодтар орналастырылған. Мұнда келушілер смартфон немесе гаджеттерге жүктелген арнайы ақпараттық қосымшаны ашып, тақтадағы штрихкодты суретке түсіру арқылы жәдігерлер туралы мәліметті сайт арқылы үш тілде автоматты түрде ала алады. Музей қорындағы жәдігерлерді кодтау жұмыстары археологиялық, нумизматикалық, этнографиялық, құжаттық және бейнелеу өнері топтамалары бойынша кезең-кезеңімен жүзеге асуда. Ал әзірге QR-код жобасында қазақ, орыс және ағылшын тілдерінде ақпарат беріледі. Болашақта мұнда қытай және түрік тілдерін қосу жоспарда бар.
Хамит ЕСАМАН,
«Егемен Қазақстан»
Жамбыл облысы
