Соңғы кездері еліміздің әр аймағында белең алған лаңкестік оқиға еріксіз жаға ұстататын болды. Күні кеше Алматының жанындағы Боралдайда болған оқиға қай-қайсымыздан да сақтық пен қырағылықты қажет ететіндігін көрсетті. Бейбіт өмірдің берекесін кетіргісі келген қылмыскерлердің бұл әрекетіне ана ретінде лағынет айтамын. Оларды да ана өмірге әкеліп, ақ сүт беріп, ертеңінен үміт күтті ғой, әттең...
Діни экстремистік әрекеттермен ертеңіне сеніммен қараған мұсылман қауымының арасына іріткі салғысы келген жексұрындарға қандай шара қолданса да артық емес. Өйткені, олар бүгінгі бейбіт тіршілігіміздің іргесін сөгуге тырысып жатыр.
Алматы облысының Іле ауданындағы Боралдай елді мекенінде болған оқиғаны соның бір нақты айғағы деп түсінемін.
Алланың жаратуымен бұл өмірге қонақ болып келдік. Алланың біз үшін қандай керемет ғаламды жаратқанына таңғалмауың мүмкін емес. Осындай сезімнен кейін барлық мақтаулар мен мадақтаулардың тек қана Аллаға лайық екенін түсінесің. Бірақ, көбіміз Тәңір берген сансыз нығметке тойымсыздықпен қарап, масаятын сәттеріміз болады-ау деген ой келеді. Маскүнемде, тоғышарда ақыл-ес болады деп кім айта алады. Ондайларға ешкімнің көңілі толғанын көрген емеспін. Ондай адам өзінің білгенін жасайды. Ал ұятсыздық пен имансыздық үстемдік құрған жерде жанымыздың, тәніміздің, жалпы өмірдің тыныштығы бұзылады. Дәл осындай ессіздердің тірлігі ұрпаққа да, қоғамға да үлкен кесел келтіріп жатыр.
Баланың дұрыс тәрбие алуына отбасындағы әке-шеше міндетті. Құнарлы жерге отырғызылған, күтімі жақсы ағаш күні ертең мәуелі жеміс береді. Бала да осындай. Айналамызға бір қарағанда бәрі әдемі, сұлулығында шек жоқ, керемет. Осы сұлулықты біреулердің түсінбейтіні қинайды. Ата-анаға қамқор болатын балаларымызды қайдағы біреулер өзінің арам пиғылына пайдаланып, жеті атада жоқ жиіркенішті әрекетке барғызып отыр.
Иә, біз алмаған қамал жоқ. Қандай қиындықты да халқымыз адалдығы мен әділеттілігі, көзсіз батырлығы арқасында жеңіп, талай өткелден өтіп, бейбітсүйгіштігін дәлелдеді. Оны әлем халқы біледі, мойындады. Бүгін Абайды, Жамбылды, Шәкәрім, тағы басқа даналарымызды кім танымайды. Абайдың асыл мұрасына зер салсақ, қазіргі өмірде болып жатқан және ұлтымыздың алдындағы бар дүниенің шешімін айтып, жол сілтеп тұрған жоқ па. Көп балалы ана ретінде көрші ауылдағы қантөгіс қолыма еріксіз қалам алдырды. Ойымды ашық айтуға үндеді.
Саналы ғұмыр кешіп, салиқалы із қалдыру үшін көкірегіміз нұрлы болуы керек. Отбасында бала-шағамен бірге ойланып, олардың өмірде адаспайтын жолды таңдауына бағыт-бағдар сілтесек, олар әлдекімдердің азғыруына бармас еді. Сонда ғана қоғамға елі мен жерін сүйетін ұрпақ дайындай аламыз. Есімізді жинайық, баянды ғұмыр кешкіміз келсе, ұлттық санамызды, салт-дәстүрімізді, бабадан қалған текті жолды сақтайық, ағайын. Тыныштығымыз бен бақытты өмір үшін қырағы болайық қашанда.
Алтын НҰРҒИСАЕВА, көп балалы ана.
Алматы облысы, Іле ауданы, Жетіген ауылы.