Целиноград ауданындағы Қабанбай батыр және Қосшы ауылдарында заманауи балалар бақшасы ашылды. Осы игі шаралардың ашылу салтанатына қатысқан облыс әкімі Сергей Дьяченко жұртшылықты қуанышқа бөлеген нысандар Елбасының Астанаға іргелес елді мекендерді дамыту жөніндегі кешенді бағдарламасына сай салынғандығын атап өтті.
Қабанбай батыр ауылы тұрғындарының сұранысын толық қамтамасыз ететін 320 орындық «Балауса» балғындар ұясы республикалық бюджет қаржысымен бой көтерді. Мұнда әрқайсысында 20 баладан жинақталған 16 топ қазақ және орыс тілдерінде тәлім алатын болады. Сондай-ақ, жаңа нысанның пайдалануға берілуімен 70 жұмыс орны құрылып отырғаны да маңызды.
Қабанбайлықтар барлық қолайлылық қарастырылған балабақшаны Тәуелсіздік мейрамы қарсаңында тарту еткен Темір Дәулетов жетекшілігіндегі «ТМZ» ЖШС ұжымына алғыстарын жаудырды.
Қосшы ауылының тұрғындары да «Бизнестің әлеуметтік жауапкершілігі» қозғалысының сыйлығына риза көңілдерін білдірді. Жергілікті кәсіпкер Есмағзам Қожахметов аумағы 400 шаршы метрлік коттедж үлгісіндегі әсем «Әмина» балабақшасын өз қаражатына тұрғызды. Жекеменшік бақша жиырма адамды жұмыспен қамтып отыр.
Бақберген АМАЛБЕК.
Ақмола облысы.