Соңғы кездегі менингит қаупі қазақстандықтардың айтарлықтай алаңдаушылығын туғызды. Осыған орай өткен аптада Денсаулық сақтау министрінің орынбасары Ләззат Ақтаева Алматы қаласының медициналық нысандарын аралап, дүрлігуге негіз жоқтығын, барлық мекемелер штаттық режімде жұмыс істеп тұрғандығын, дәрі-дәрмек қорының жеткілікті екендігін, ең бастысы, аурудың алдын алу шараларынан тыс қалмау керектігін жеткізген болатын. Ал Қоғамдық денсаулық сақтау комитетінің төрағасы Жандарбек Бекшиннің мәлімдеуінше, биыл елімізде менингококк жұқпасына шалдыққан 62 жағдай тіркелген екен.
Оның ішінде 8 жағдай өліммен аяқталған. Марқұм болғандардың екеуі Алматы облысының, екеуі Оңтүстік Қазақстан облысының тұрғындары. Ж.Бекшиннің айтуынша, аурудың өліммен аяқталуына науқастардың менингит әбден меңдегенше елемей, дәрігерлерге қаралмай жүріп алуы себеп болған. Мәселен, Қазақ көлік және коммуникация академиясының студенті 3-4 күн бойы ауырса да, дәрігерге тексерілмей жатақханада жата берген. Ал тексерілген кезде кеш болған, ауру асқынып кеткен. Қатерлі жұқпаның таралу оқиғасы негізінен Алматы қаласы мен Шығыс Қазақстан, Оңтүстік Қазақстан және Алматы облыстарында, сондай-ақ Астана қаласында да байқалды. Алматы қаласының өзінде 29 адамда аталған ауру анықталды. Науқастармен байланыста болған 2200 адам дәрігерлердің қадағалауына алынды. Олардың ішінде 2 тасымалдаушы мен 3 ауруға шалдыққан адам анықталды. Ал 2017 жылы Қазақстанда менингококк жұқпасынан 11 адам көз жұмған болатын. Былтыр бұл жұқпаға шалдыққандардың дені Оңтүстік Қазақстан облысының тұрғындары еді.
Бас мемлекеттік санитар Ж.Бекшин соңғы кездегі менингиттің таралуын аурудың белгілері білінбей, бірақ жұқпалы дертті таратушылардың саны артқандығымен және ауа райының құбылмалылығымен байланыстырады. Күні кеше Астана қаласында балалар инфекциясы ауруханасында менингококк жұқпасы диагнозымен емделіп жатқан бала туралы ақпарат та жұртшылық көкейіндегі күдікті ұлғайта түскендей. Үш жастағы бала біршама уақытын Алматы қаласында өткізіп, Астанаға 24 мамырда келген екен.
Қалалық балалар инфекциясы ауруханасы бас дәрігерінің емдеу ісі жөніндегі орынбасары Ольга Пушкареваның айтуынша, баланың жағдайы ауыр, бірақ тұрақты. Бүлдіршінді аман алып қалуға ата-анасының дер кезінде көмекке жүгінуі мен дәрігерлердің диагнозды тез анықтауы мүмкіндік берді. Бала жеке жатқызылғанымен, дәрігерлер штаттық режімде жұмыстарын жалғастырды. Яғни тұмшаланып, сақтық шараларын күшейтудің қажеттілігі жоқ. Өйткені бұл жұқпаның қоздырғышы сыртқы ортада тұрақсыз болып келеді.
Астана қалалық қоғамдық денсаулық сақтау департаментінің эпидемиялық қадағалау бөлімінің бас маманы Ақмарал Мейірманова елордада жыл басынан бері балалар арасындағы менингококк жұқпасы бірінші рет тіркелгенін айтады. Ал ересектер арасында 4 жағдай тіркеліп, барлығы құлантаза жазылған. Қалалық балалар инфекциясы ауруханасының балалар жұқпалы аурулары кафедрасының доценті Анна Бринстер диагноздың асқынбай тұрып қойылуының арқасында ешқандай мәселе тумағанын жеткізді. Сондықтан алғашқыда тұмау, бас ауру, әлсіздік сияқты жеңілдеу белгілер байқалса-ақ дәрігерге жүгіну қажет.
Думан АНАШ,
«Егемен Қазақстан»
