«Қазақ елі» монументі орналасқан алаңда өткен концертке дейін сахна жұлдыздары қаланың әлеуметтік мекемелеріндегі және ауыр сырқаттармен ауыратын балаларға барды. Аталған қайырымдылық акцияны Астана қаласының мәдениет және спорт басқармасы ұйымдастырды. Атап айтқанда, әншілер Ана мен бала ұлттық ғылыми орталығының онкология бөлімінің пациенттерімен кездесіп, бүлдіршіндерге мықты денсаулық тіледі.
– Қандай керемет балалар! Бәріңізге жақсы көңіл күй тілеймін. Әрдайым қуанып, шаттанып жүріңіздер. Барлық аурудан сауығып кетіңіздер, ата-аналарға шыдамдылық тілеймін, – деді ресейлік әнші Анна Семенович.
Шоу-бизнес өкілдеріне Ана мен бала ұлттық ғылыми орталығының директоры Расулбек Аипов бүлдіршіндердің атынан алғыс айтты.
– Балама бір жас үш ай болды. Осында төрт айдан бері жатырмыз. Біз теледидардан ғана көретін жұлдыздардың қатысуымен өтетін осындай ауқымды шараны алғаш рет көріп отырмыз. Ұйымдастырушыларға ризашылық білдіреміз. Балаларды қорғау күні қарсаңында балаларымыз ауырмасын, тезірек сауығып кетсін деймін, ал ата-аналарға шексіз шыдамдылық пен күш-қуат тілеймін, – деді кішкентай Виталийдің анасы Вера.
Дәл осы іспетті кездесу SOS Астана балалар ауылында, Балалар психоневрологиялық медициналық-әлеуметтік мекемесінде де өтіп, Қазақстан мен Ресей эстрадасының жұлдыздары ән айтып, би билеп, балалардың көңілін көтерді және түрлі ойыншықтар сыйлады.
«Егемен-ақпарат»
