![Жоламан Тұрсынбаевтың «Айналайын, Қызылжар!» шығармашылық кеші өтті](/article_photo/1528341308_article_b.jpeg)
Оның жүрек толғанысынан, көңіл толқынысынан, сезім пернесінен, шығармашылық шабытынан туған әннен операға, шағын дивертисменттен симфонияға дейін түрлі жанрды қамтитын туындылары жиі орындалатыны сондықтан. Қазақтың ұлы тұлғаларына арналған «Ер Жәнібек», «Бекет ата», «Төле би», «Ұлбике» секілді біртуар дүниелері автордың өзіндік қолтаңбасымен, әуезді үнімен ерекшеленеді. Ал «Ауылында бар ағаның қызқарағай» әнін «теріскейдің бренді» десе де болады.
Солтүстікқазақстандық өнерсүйер қауымның жерлесін құрмет тұтатыны соншалық, жастар сарайында ине шаншар орын болмады. «Айналайын, Қызылжар!» шығармашылық кешінде сөйлеген сөзінде өңір басшысының орынбасары Мадияр Қожахмет облыс әкімі Құмар Ақсақаловтың жылы сезімге толы құттықтау лебізін жеткізіп, иығына шапан жапты. Мәдениет және спорт министрі Арыстанбек Мұхамедиұлының Алғыс хаты табыс етілді. Қазақстан Композиторлар одағының төрайымы Балнұр Қыдырбектің сөзі өте әсерлі шықты.
«Соңынан еріп келе жатқан біз үшін – асыл аға, замандастары үшін – кемеңгер, ал қазақ өнері үшін қатардағы жауынгер. Кез келген майдан жеңіске қатардағы әр жауынгердің арқасында жетеді. Қазақ өнері де солай. Соңғы жылдары екі нотаның басын қосқанына мәз болып, өзін керемет санап, кеудесін соққандар көбейіп кетті. Бірақ олар емес, бүгінде қазақ өнерін дамытып, биік шоқтыққа шығаратын – күнделікті ісін сапалы, көркем түрде атқаратын кәсіби маман ғана. Сол кәсіби шеберлігімен өз үлесін қосып жүрген талант иелерінің бірі–біздің Жөкең», дей келіп, патриоттық тақырыпқа және лирикаға толы екі қырын айрықша атап өтті.
Сахна шымылдығы Сегіз сері атындағы қазақ халық аспаптар оркестрі мен «Әдемі-ау» халық би ансамблінің сүйемелдеуінде «Елігай» әнінің орындалуымен ашылды. Республикалық байқаулардың лауреаттары Динара Тауышева, Бақыт Ілиясов, Дәмеш Құрманкина, Асхат Тауышев композитордың «Есілім», «Туған жер», «Ұлбикенің соңғы әні», «Бекет ата – пір ата» әндерін нақышына келтіре орындап берді. Қазақстанның еңбек сіңірген қайраткері, Тұңғыш Президент қорының лауреаты, Қазақ ұлттық өнер университетінің профессоры Азамат Жылтыркөзов «Меңгесер», «Атырауым – атажұртым», «Айгүлім» әндерін сыйлап, жұртшылықтың құлақ құрышын қандырды.
Осы кеште бірқатар жаңа әндердің тұсауы кесілді. Солардың бірі биыл 125 жылдық мерейтойы атап өтілетін Мағжан Жұмабаевтың «Айдын шалқар көлім-ай», «Қазақ тілі» өлеңдеріне жазылған әндер жиналғандарды ерекше тебірентіп, нұр шуағын төгілдіргендей сезімге бөледі.
Кеш соңында композитордың туған жері – Есіл ауданы әкімінің орынбасары Еділ Тұтқышев, аудандық ардагерлер кеңесінің төрағасы Төлеген Мұқашев, белгілі жазушы-журналист Жақсыбай Самрат жүрекжарды тілектерін арнап, сый-сияпаттар жасады. Ұлт жанашырларының бірі Жомарт Омаров өңір кәсіпкерлері атынан «темір тұлпардың» кілтін тарту етті.
– Айналайын, Қызылжарым! Саған басымды иемін! Алақанға салып өсірдіңдер, еркелеттіңдер! Мен үшін бұдан асқан бақыт жоқ! – деп тебірене, толғана сөйлеген өнер иесі шығармашылық кешін өткізуге бір кісідей атсалысқан көпшілікке ақ алғысын білдірді.
Өмір ЕСҚАЛИ,
«Егемен Қазақстан»
Солтүстік Қазақстан облысы