Аустралиялық аңыз
Бұл оқиғаға біреу сенер, біреу сенбес. Аустралия құрамасын кезінде «қарғыс атқан» деп келді. Кенгуру мен жабайы ит динго жайлаған елдің командасы Родизия құрамасымен ресми матч
өткізуі тиіс еді. 1969 жылы өткен матчтар топтамасының үшіншісінде жасыл құрлықтың басты командасына жеңіс ауадай қажет-тұғын. Сонда футбол саласында жүрген атқамінерлердің бірі сиқыршы, әрі бақсы кісіден көмек сұрапты. Ол «менің көмегіммен жеңіске жетесіңдер, уайымдама» дейді. Аустралия 3:1 есебімен жеңіп, Әлем чемпионатына жолдама алады. Бірақ кейіннен әлгі балгерге 1000 фунт көлемінде уәде етілген қаламақыны бермей кетіпті. Содан бері, Аустралия құрамасы көптеген жылдар бойы Әлем чемпионатына шыға алмай қояды. Осы әңгімені естіген журналистер бұл жағдайды «футбол қарғысы» деп бағалап жібереді. 1969 жылы құрама сапында болған футболшы Джонни Уоррен осы оқиға жайлы өзінің өмірбаянында жазып өтеді. Мұны естіген Джон Сафран есімді тележүргізуші 2004 жылы арнайы Мозамбикке барып, әлгі сиқыршыны іздейді. Алайда дуа салған бақсы өмірден озып кетіпті. Есесіне, басқа балгер «бұл қарғысты алып тастаймын, тек кешірім сұрап, қаламақыны төлеңіз» дейді. Сафран балгердің айтқанын бұлжытпай орындайды. Осыдан кейін 2006 жылы Аустралия құрамасы ұзақ уақыттан соң Әлем чемпионатына жолдама алады. Міне, содан бері Аустралия құрамасы бірде-бір мундиальды мүлт жібермей келеді.
Құрлық ауысқанымен, құрама өзгермеді
Өздеріңіз білетіндей, Аустралия бұрындары өз аймағындағы елдермен ірктеу ойындарын өткізіп, қарсылас біткенді жапырып жіберетін. Тіпті Самоа секілді құрамаларды 31:0 есебімен ойсырата жеңіп, әлемдік рекорд орнатып еді. ФИФА-ның шешімі бойынша Аустралия Азия құрлығына ауысты да, Мұхит жағалауы елдері конфедерация-
сында басты фаворит Жаңа Зеландия құрамасы болып шыға келді. Олар Латын Америкасының 5-орын алған құрамасымен жолдамаға таласады. Осыған дейінгі іріктеулерде еш қиындық көрмейтін Аустралия Азия командаларын менсінбейтін жағдайға да жетіп еді. Өзбекстанды Азия кубогында 7:1 есебімен жеңіп, көрші құраманы жер қылды. Бірақ соңғы іріктеуде аустралиялықтар мундиаль жолдамасын зорға иеленді. Алғашқы іріктеу кезеңінде Қырғызстан, Тәжікстан, Бангладеш, Иордания секілді ұжымдардың тас-талқанын шығарды. Тек Иорданиядан ғана 1 гол жіберіп алды. Екінші кезеңде Жапония мен Сауд Арабиясын алға жіберіп, топтағы үшінші орынды алды да, келесі топтағы Сириямен өтпелі ойын өткізді. Оны жеңген соң Солтүстік Америкадан шыққан Гондурасты ұтты. Осылайша Берт Ван Марвейк шәкірттері ең соңғылардың бірі болып Ресейге жолдама алды.
Көздегені плей-офф
Нидерландиялық бапкер Марвейктің жоспары жойқын. Ол әзірге бір мақсат қойып отыр. Бірінші кезекте Франция, Дания, Перу секілді ұжымдардың арасынан плей-оффқа жолдама алу. Топтан шығып алсақ, кем дегенде жүлделі орындарға таласа аламыз дейді. Құрамында сол баяғы кәрі қасқыр Тим Кэхил, Милле Единак секілді ойыншылары бар Аустралия Том Рогич секілді талантты жастарға да сенім артады. Рогичті «Селтик» – «Астана» арасындағы ойында қазақстандық футбол жанкүйерлері де көрген еді.
Аустралия алғашқы ойынды 16 маусым күні Францияға қарсы өткізеді де, араға 5 күн салып Даниямен ойнайды. Соңғы матч 26 маусым күні Перу құрамасына қарсы өтпек.
• қақпашылар: Мэттью Райан («Брайтон энд Хоув Альбион», Англия), Данни Вукович («Генк», Бельгия), Брэд Джонс («Фейеноорд», Нидерланд).
• қорғаушылар: Әзиз Бехич («Бурсаспор», Түркия), Милош Дегенек («Иокогама», Жапония), Мэттью Юрман («Сувон Самсунг Блюуингз», Оңтүстік Корея), Джеймс Мередит («Миллуолл», Англия), Джошуа Рисдон («Вестерн Сидней Уондерерс»), Трент Сэйнсбери («Грассхоппер», Швейцария).
• жартылай қорғаушылар: Миле Единак («Астон Вилла», Англия), Джексон Ирвин («Халл Сити», Англия), Робби Круз («Бохум», Германия), Массимо Луонго («Куинз Парк Рейнджерс», Англия), Марк Миллиган («Әл-Ахли», Сауд Арабия), Аарон Муй («Хаддерсфилд Таун», Англия), Том Рогич («Селтик», Шотландия).
• шабуылшылар: Тим Кэйхилл («Миллуолл», Англия), Томи Юрич («Люцерн», Швейцария), Мэттью Леки («Герта», Германия), Эндрю Наббут («Урава Ред Даймондс», Жапония), Димитрий Петратос («Ньюкасл Юнайтед Джетс»), Дэниел Арзани («Мельбурн»), Джейми Макларен («Дармштадт 98», Германия).
Ермұхамед МӘУЛЕН,
«Егемен Қазақстан»
