Міне, барша еліміз Тәуелсіздік күнін атап өтіп жатыр. Елінің болашағына бейжай қарай алмайтын әрбір қазақ азаматының жүрегінің түкпіріндегі дербес мемлекет болсақ деген сезімдердің шыдас бермей дүркін-дүркін бұлқынуының нәтижесінде үш ғасыр уақыт бойы әр кезеңдерде орын алған ұлт-азаттық көтерілістері мен қозғалыстардың соңғысы – желтоқсанның екпінімен келген тәуелсіздіктің біз үшін орны қашанда бөлек. Сондықтан да, толарсақтан саз кешкен батыр бабаларымыздың еркіндік үшін төгілген қанының, ұлы мұраттар жолында құрбан болған асыл азаматтарымыздың, асқақ армандарын сәбиіндей білегімен, даласын жүрегімен тербеткен аналарымыздың ақық көз жасының өтеуіндей Тәуелсіздігімізді біз әрқашан мақтан тұтып, қастерлей білуге тиістіміз. Біле білсек, бұл – біздің азаматтық парызымыз, адамдық борышымыз.
Өзгелермен тереземізді тең еткен Тәуелсіздігімізді бағалай білуіміз керек. Әрі келешек ұрпақ санасына осыны ұғындыра білуіміз керек. Ұлт тарихында мәңгі сақталатын, келешек ұрпақ тағылым алатын кешегі желтоқсанның жігерінің арқасында еліміздің еркіндікке қол жеткізуіне жиырма жыл толды. Тарих үшін бұл қамшының сабындай қысқа уақыт болғанымен, Қазақстан Елбасы Нұрсұлтан Назарбаевтың сара саясатының арқасында ғасырларға татитын толайым істерді атқаруға қол жеткізді.
Осы жылдар ішінде Қазақстан әлемдік аренадан өз орнын ала білді. Бүгінде біздің мемлекет әлемдік қоғамдастықтың құрметті әрі лайықты мүшесі. Әлемдегі, өңірдегі көкейкесті халықаралық саяси және экономикалық мәселелерге қатысты Қазақстанның позициясымен барлық елдер санасады. Осының барлығы жиырма жыл ішінде атқарылған тынымсыз еңбектің, қажырлы жұмыстың, сындарлы саясаттың арқасы. Қазақстанның экономикалық-әлеуметтік салалардағы реформалары, ұлтаралық татулық пен конфессияаралық келісімді сақтаудағы қадамдары, бейбітшілік пен қауіпсіздікті қамтамасыз етудегі жүзеге асырып жатқан жұмыстары ТМД кеңістігінде ғана емес, әлемдік деңгейде де мойындалып отыр.
Жүріп өткен жолымызға көз жіберсек, тәуелсіздігінің бірінші күнінен-ақ ең алдымен ішкі тұтастығы мен қауіпсіздігіне айрықша мән берген Қазақстан сыртқы саясатын да сындарлы жүргізе білді. Нәтижесінде біздің еліміз тоқсаныншы жылдары Кеңес Одағының құрамында болған бірталай мемлекетті шарпыған қақтығыстарды айналып өтті. Бір сөзбен айтқанда, Мемлекет басшысының ұстанған дұрыс позициясы мен жүргізген сындарлы саясатының арқасында Қазақстан ішкі тұрақтылығын сақтап қана қоймай, көптеген халықаралық бастамалар көтеріп, әлемге үлгі көрсетер деңгейге көтерілді. Сонымен бір мезгілде, дүние жүзі мемлекеттерімен достық, әріптестік байланыстар орнатты.
Отанымыздың ядролық қарудан бас тартып, Семей сынақ полигонын жапқаны өзін бейбітшілік сүйгіш мемлекет ретінде танытқанының айқын айғағы болды. Қазақстан жас та болса бас болып, талайларға осылайша өнеге көрсетті.
Жалпы, тәуелсіздік қазаққа өз әскерін құруға, төл теңгесін шығарып пайдалануға, тағдыр тәлкегімен шет елдерге кеткен қандастарын елге қайтарып қауышуға, солақай саясаттың кесірінен жабулы күйінде қалып қойған мәдени мұраларын түгендеуге, түптеп келгенде, өз елінде, өз жерінде еркін тыныстауға мүмкіндік туғызды. Бұл шешімдердің бірқатары ұзақ уақыт елорда болған Алматыда қабылданса, басым көпшілігі Отанымыздың жүрегі Астанадан бастау алды.
Тәуелсіздігіміздің болашағы, мемлекетіміздің келешегі, Қазақстан халқының тағдыры үшін Елбасының елорданы Алматыдан Ақмолаға көшіруі де шын мәнінде тарихи шешім болғандығын бүгінгі күн дәлелдеп отыр. Астана қазақстандықтар арманын арқалаған тәуелсіз Қазақстанды биік шыңдарға жетелеген шаһарға айналып келеді. Олай болса, Жаратқан дәйім елімізді аман, жұртымызды тыныш етсін, халқымыздың басынан бақ-береке, бірлік кетпесін! Мерейлі мереке – Тәуелсіздігіміздің 20 жылдық торқалы тойы құтты болып, ұзағынан сүйіндірсін! Теңдік әперген тәуелсіздігімізді қашанда көзіміздің қарашығындай сақтап, бағалай білейік!
Сүйіндік ЖҰМАҒҰЛОВ, Астана қаласы Әділет департаменті бастығының орынбасары.