![Семейде сатылған жер теліміне байланысты тұрғындар наразылық білдіруде](/article_photo/1528863296_article_b.jpeg)
Бір белгілісі, «Байкенов» кәсіпкерлігі бұл жер телімін Затаевич көшесі, 33-үй мекенжайында орналасқан көппәтерлі үйдің алды деп сатып алған. Сөйтіп М.Әуезов даңғылы мен Победа көшесінің қиылысын өзінше «ретке» келтіре бастайды. Тұрғындардың айтуы бойынша, жеке кәсіпкер аукцион арқылы бұл жерді алдым деп, осындағы балалар алаңын бұзып, біраз ағашты кесіп тастаған. Халық даулап отырған көппәтерлі үйдің сырт жағы Затаевич, 33-үйдің жанында орналасса, бір бұрышы М.Әуезов даңғылы мен Победа көшелерінің қиылысына келіп тіреледі екен. Тұрғындардың басым көпшілігінің айтуларынша, бұл дау осыдан туындап отыр.
Жуырда қала әкімі Ермак Сәлімов осы дауға қатысты жергілікті тұрғындармен кездесуге келді. Оның айтуынша, бұл шешім өзіне дейінгі әкімдердің кезінде қабылданған. Қазір әкімдік халықтың жағдайына, талап-тілегіне қарай әрекет етуге дайын, бірақ даулы мәселе заң бойынша тек сот арқылы ғана шешіледі.
– Семейге басқа әкім басшы болған кезде М.Әуезов даңғылы мен Победа көшесінің арасындағы жерді алуға кәсіпкерге тыйым салу керек еді. Өкінішке қарай, олай жасалмаған, – дейді қала басшысы. – Осылайша маған үнемі өткен жылдың осы тақылеттес даулы дүниелерін шешумен айналысуға тура келіп тұр. Жылын қарасаңыздаршы, алғашқы аукцион 2014 жылы өткен. Мен ол кезде әкім болған жоқпын. Бірақ дәл қазіргі уақытта халықтың мұң-мұқтажын қарастырмай қоя алмаймын. Сіздерге көмектесуге әзірмін.
Қала әкімі даулы жерді мемлекет қазынасына сот арқылы қайтарған жөн деп санайды. Бірақ «Байкенов» ЖК басшысы Анар Байкенова «Атамекен» ұлттық кәсіпкерлер палатасы мен облыс басшылығына шығып, жер телімін қайтарудан үзілді-кесілді бас тартыпты.
– Менің сөзімді неге ешкім естігісі келмей тұр? – дейді Анар Амангелдіқызы. – Иә, «Байкенов» кәсіпкерлік нысаны бұл жерді алды. Енді абаттандырамын десем де, ешкімнің тыңдағысы жоқ. Сол себептен Ұлттық кәсіпкерлер палатасына шығуыма тура келді. Алған жерімді қоршап қойғаным сол-ақ еді, қарсыласқан топқа тап болдым. Қолымдағы құжаттарым барлық талапқа сай. Ағаштарды кесіп тастады дейді, бірақ бұл жерге осыған дейін ешкім назар аудармай, қоқыс болып жатыр еді. Менің тұрғын үйдің алдына зәулім нысан салмайтыным түсінікті ғой. Біреулер тұрғындарды әдейі шатастырып отыр.
Қала әкімі Ермак Сәлімовпен кездескен тұрғындардың Анар Байкеноваға қарсы уәжі бар. Олардың айтуларынша, бұл жерде өсіп тұрған ағаштарды кесіп тастап, орнын көгалдандырамын деудің қажеті жоқ. Осы үйде 38 жылдан бері тұратын Ирина Безродная бұл тұста шағын бақ болғанын, оған өзі көшет еккенін айтады. Сатып алушы ағаштарды қалай кескенін көзімен көріп, жылап тұрып бейнежазбаға түсіріп алыпты.
– Мен Затаевич көшесі, 35-үйдің тұрғынымын, – деді сәбиін көтеріп келген жас ана Айнұр Жамболатова. – Бұл жерге қалай ғимарат салмақшы? Бұрынғы әкімдер бұған қалай рұқсат еткен? Жаз бойы құрылыс жұмыстарын жүргізсе, маңайдың бәріне шаң көтеріліп, төңірек астаң-кестең болмақ. Ол өз алдына, егер қандай да бір ғимарат салса, мына маңайда әрлі-берлі жүрудің өзі қиындап қалады. Көріп тұрсыздар, аядай ғана жер. Ертең төтенше жағдай бола қалса, өрт сөндірушілер мен құтқарушылардың көліктері қалай өтеді?! Соны неге ойламайды?! Айналаның бәрі қаптаған дүкен, түрлі кәсіпкерлік нысандар. Демалатын жер қалмады, ағаштарды кесіп тастады.
Тиісті заң талаптары бойынша, қала ішіндегі жер телімдері жалпы ортақ қолданыстан алынған жағдайда ғана жеке меншікке берілуі мүмкін. Біз айтып отырған мәселеде бұл жайт ескерілмеген сыңайлы. Аукционға түскен жердің мекенжайы: Затаевич, 35 «А» деп көрсетілген. Бірақ жер М.Әуезов даңғылы мен Победа көшесінің қиылысында тұр. Бір қызығы, бұл жер телімінің сатылатындығы туралы қаланың қоғамдық кеңесі де, қала құрылысы бөлімі де хабарсыз болған.
Қала әкімдігі жағдай толық шешімін тапқанға дейін кәсіпкер Анар Байкеноваға құрылысын жүргізуге тыйым салған. Тұрғындардың наразылығына байланысты жұмыс тоқтап қалған кезде құрылыс алаңы қоршалған күйі қала беріпті. Тұрғындардың өтінішіне құлақ түрсек, бұл жерде бұрын болған шағын саябақтың қалпына келтірілгенін қалайды. Қала әкімі Ермак Сәлімов болса тиісті сот шешімі шыққан соң бұл жерге жаңадан ағаштар отырғызылып, балалар ойнайтын алаң ашылады деп отыр.
Раушан НҰҒМАНБЕК,
журналист
СЕМЕЙ