![«Ұмытпаймыз! Білеміз! Жеңеміз!» атты республикалық науқан басталды](/article_photo/1528866098_article_b.jpeg)
18 мамырда елімізде ЖИТС-тен қайтыс болған адамдарды еске алудың халықаралық күніне орай, «Ұмытпаймыз! Білеміз! Жеңеміз!» атты республикалық науқан басталды. Бұл шара Алматыдағы республикалық ЖИТС орталығынан бастау алды.
ЖИТС-тен қайтыс болғандарды еске алуда АИТВ індетіне тап болған адамдарға ниеттестігін білдіру үшін мемлекеттік, халықаралық, діни және үкіметтік емес қоғамдық ұйымдардың өкілдері, медицина қызметкерлері, студенттер, медиалық тұлғалар жиналды. Аталмыш акцияға ЖИТС-тің алдын алу және оған қарсы күрес жөніндегі республикалық орталығы, Алматы қаласының Денсаулық сақтау басқармасы, «АИТВ-мен өмір сүретін адамдардың қазақстандық одағы» заңды тұлғалар бірлестігі, ЮНЭЙДС, Алматы қаласының ЖИТС орталығы, С.Д.Асфендияров атындағы Қазақ ұлттық медициналық университеті, PSI ұйытқы болды.
– Бұл науқанның мақсаты – індет жалмаған адамдарды еске алумен қатар, халықты АИТВ-мен өмір сүретін адамдарға (АӨА) түсіністікпен қарауға шақыру. Аталған санаттағы адамдардың денсаулығын сақтау үшін бүгінгі таңда мемлекет оларға тегін түрде антиретровирустық терапия ұсынуда. Емдеу кестелері үнемі жақсартылып отырады, жаңа антиретровирустық препараттар сатып алынуда. Жылдан-жылға ЖИТС-тен болатын өлім-жітім айтарлықтай төмендеп келеді, – дейді ЖИТС-тің алдын алу және оған қарсы күрес жөніндегі республикалық орталықтың бас директоры Бауыржан Байсеркин.
Қазақстанда АИТВ індетінің басталған сәтінен бастап ЖИТС-тен 9 мыңнан астам адам қайтыс болған. Дегенмен індеттің алғашқы жылдарында АИТВ-мен өмір сүріп жүрген адамдарда дәрілерді таңдау мүмкіндігі болмағандықтан, бір жылда 280 адам қайтыс болған. Ал қазір түбегейлі шараларды қабылдау нәтижесінде бұл қарқын айтарлықтай төмендеді. АИТВ жұқтырған балалар тек түпнұсқалық препараттарды қабылдайды. АИТВ-нің анадан балаға берілуін тоқтату үшін барлық жүкті әйелдер АИТВ-ге екі рет тексеріле алады. Ал тестілеу жасау елде тегін, ерікті, қалауы бойынша құпия түрде жүргізіледі. Жыл сайын АИТВ-инфекциясына тестілеуден өтіп жүрген қазақстандықтардың саны артуда. Жағдай бақылау сатысында тұр.
Акция кезінде қажет деп тапқандар АИТВ-инфекциясына жедел-тестілеуден өтуге мүмкіндік алды. Викториналық сауалдарға қатысып, өз дертін жария еткен сұрақтар қойды.
Мұндай дерттің бар екенін қашанда қаперде ұстау үшін әрі қарай науқан еліміздің барлық аймағында өткізілетін болады.
Айнаш ЕСАЛИ,
«Егемен Қазақстан»
АЛМАТЫ